لحمة بالبصل و الجزر

السلام عليكم يا قمرات

معانا لحمة بالبصل و الجزر شبه كباب حله بس عليها جزر كمان.

المقادير:

½ كيلو لحمة متقطعه صغيره./ جزر مبشور / بصل مفروم ناعم / ملح و فلفل و بهارات / زيت.

الطريفه:

1-    نفرم البصل و نبشر الجزر.

2-    نجيب حله و نحط فيها زيت و ندبل البصل مش تنسوا تحطوا شويه فلفل أسمر عشان الدموع.

3-    نحط اللحمة و نقلب نسيبها تنزل ميه .

4-    نحط ميه كل ما تنشف و طبعا البهارات و نضيف الجزر .

5-    نسيبها علي النارر لحد ما تستوي و يكون فيه صوص.

6-    تتقدم مع رز أو مكرونة

يا رب تكون عجبتكم

بفتيك

السلام عليكم يا قمرات

معانا النهارده بفتيك محمر طبعا كلنا عارفينه و أكيد الكل بيحبه.

المقادير :

نص كيلو بفتيك / عصير ليمونة / ملح / فلفل / قرفه/ بابريكا / كزبره ناشفه / جنزبيل / كاري / نص كوبايه ميه بصل / بيض و بقسماط للتغطيه

الطريقه:

1-    حنحضر البهارات و عصير اليمونة و نضيفهم علي ميه البصل.

2-    أنا بحط اللحمة في كيس و بحط عليها التتبيله و أقفل الكيس زي ده كده و أهزها كويس و ألفاها و أحطها في التلاجة في علبه لمده مش تقل عن ساعه.

3-    نحضر البيض و البقسماط و لو كانت اللحمة فيها سائل كتير يبقي نستعمل الدقيق الأول .

4-    انا هنا استخدمت بيض و بقسماط عشان اللحمة كانت ناشفه نوعا ما.

5-    بعد ما نغطيها بالبقسماط نحطها في الفريزر ربع ساعه كده.

6-    نسخن الزيت كويس قوي و نقلي البفتيك علي نار مش عاليه و مش نقلبه كل شويه عشان القشرة مش تفك و لما يستوي حطيه في الفرن مش تعرضيه للجو عشان مش ينشف.

يا رب يكون عجبكم

دجاج بصوص البرتقال

السلام عليكم يا قمرات

الوصفه دي من حبيبتي سوسي من منتدي عروس  ان شاء الله تعجبكم.

المقادير:

4 وراك مخليه / ملح وفلفل وجنزبيل باودر وفلفل اسود حصي وسماق / عصير 2 حبة برتقال بلدي + قشر برتقال مبشور/حوالي معلقتين تلاتة كبار + جنزبيل فريش مقطع شرائح رفيعة

الطريقه:

1-    خلطت كل المكونات اللي فاتت مع بعضها وبعدين تبلت الفراخ بيها لتاني يوم.

2-    الصبح بقي يادوب اخدت الفراخ من التتبيلة بعد ماشلت شوية من قشر البرتقال او شرائح الجنزبيل اللي عليها وحمرتها في السمنة.

3-    تحمير بسيط اوي علي الوشين مجرد اخدت لون مش اكتر لكن ماتستويش وبعدين شلتها من السمنة ورصيتها في صينية.

4-    وفي الوقت دة كنت محضرة بصلة مقطعة جوانح.

5-    حطيتها علي الفراخ في الصينية هي والتتبيلة اللي كانت فيها الفراخ تاني .

6-    ودخلتها الفرن عشر دقائق تقريبا وبعدين فتحت الشواية عليها دقيقتين لغاية ما الصوص اللي تحت نشف تقريبا وطلعتها.

ملحوظه:
الوصفة دي افضل نتيجة ليها بالبرتقال البلدي علشان تبقي فيها مزازة ومش مسكرة اوي.

يا رب تعجبكم و أنا نقلتها زي ما هيا كاتباها تمام

رولات الفراخ بالموزاريللا

السلام عليكم يا قمرات

معانا النهارده رولات الفراخ سهله و مش مكلفه و حاجة تغير.

المقادير :

نص كيلو بانيه / جبنة موزريللا أو شيدر / ملح / بابريكا / فلفل / كاري / قرفه / دقيق / بيضه / بقسماط للتحمير.

الطريقه:

1-     نجيب كيس بلاستيك و نحط شريحة البانيه بينه و ندقها بمدق اللحمة لحد ما تكون رفيعه.

2-     نجيب ورق الومنيوم و نقطع زي الصورة و نحط البانيه و نرش ملح و فلفل و نحط الجبنة و نلفها و نقفلها كويس .

3-    نغلي ميه و نسقطهم فيها لمده ¼ ساعه .

4-    نشيلها من الميه و نفتحها و نأخد بالنا حيكون فيها ميه.

5-    نحضر الدقيق و نحط ملح و فلفل و باقي البهارات و نحضر بيضه و بقسماط.

6-    نغمس الرول في الدقيق ثم البيضه ثم البقسماط.

7-    نحطها 10 دقايق في الفريزر و بعد كده نقليها.

يا رب تكون عجبتكم

كوسا باللبن

السلام عليكم 

النهارده معنا كوسا باللبن من ايد شاهي من منتدي عروس ...شكلها جميل 

المقادير:

   كوسا  / للحم مفروم /بصل/ثوم/علبة زبادى/للبن (حليب ).. حنستخدم حوالى كوب/نشا ذرة/زيت _زبدة

الطريقه:

1-نغسل الكوسا و نحفرها و نرشها شوية ملح و عصير نص لليمونة.

2-نحمر بصلة مبشورة و نحط عليها اللحمة و ملح و فلفل اسود و بهارات (بابريكا_قرفة_شطة_زنجبيل) .

3-نحشى الكوسا.

4- نقليها فى الزيت نص قلى.

5-نجهز صوص الزبادى (علبة زبادى_كوب حليب_معلقة صغيرة نشا ذرة .. او دقيق) و رشة ملح و فلفل اسود.

6-نقلب لحد ما الصوص يثقل.

7-نحط الكوسات فى الصوص.

8-نشوح فصين ثوم و شوية كزبرة خضراء فى ملعقة صغيرة زبدة. نحطهم على الكوسا.

يا رب تكون عجبتكم

دجاج مشوي في الفرن (2)

السلام عليكم يا قمرات

انهارده معانا فراخ مشويه من أم ياسين العسل حبيبتي من منتدي عروس ( الموضوع  من مجهودها وتصويرها وعمايل ايديها طبعا )

المقادير :

دجاجه /بهارات مكونه من : ملح فلفل اسود شطه جنزبيل حبهان مطحون بهارات فراخ وبهارات عاديه ونعناع ناشف مطحون واكيد حبيب الفراخ الزعتر بنوعيه / علبة زبادى صغيره/ طماطم مبشوره او صلصه زى ماتحبى/ ليمون وخل

الطريقه:

1-    هنجيب الفراخ ننضفها كويس جدا جدا بالملح والدقيق ونسيبها تتصفى و نعمل فيها فتحات للضمان التسويه.

2-    هنخلط بهارتنا مع الزبادى وباقى المكونات.

3-    هنحط فيها الفراخ ونحاول ندخل الخلطه فى كل مكان ممكن.

4-    ونسيبها فى الخلطه على قد ما نقدر وندخلها الفرن تستوى على الرف الاوسط لمده ساعه ونص لساعتين وبعدين لما تستوى بنفتح عليها الفرن وندهن الجلد بخليط من الزعتر والخل ونفتح الشوايه ونتركها لدقائق عشان تتحمر .

يا رب تعجبكم

كانيلوني باللحم

السلام عليكم 

الكنالوني ما هو الا عجينة كريب محشوة باللحم المفروم و مضاف اليها صوص الطماطم و الجبن

المقادير :

2 كوبايه لبن ( حليب ) / 3 بيضات / كوبايه و نص دقيق / ملح و فلفل أسمر / م ك زيت

الطريقه:

1-    حنخلط البيض مع اللبن و الفلفل و الملح و الزيت.

2-    حنضيف الدقيق ( ممكن تحتاجي دقيق أقل شويه علي حسب نوع الدقيق )

3-    المفروض يكون مش تقيل و لا سايل قوي زي الميه يكون قوامه متوسط أقرب للسيوله منه للسماكه.

4-    نجيب طاسه تيفال ( لازم تيفال ) و ندهنها بالفرشاه بالزبده و نسخنها و نحط بالمغرفه الصغير بتاعه الشوربه ( ممكن تسنعملي فنجان قهوة ).

5-    و لما أطرافها تتحمر نقلبها علي الوش التاني .

6-    بعد ما نعملهم كلهم نحضر اللحمة ( أنا كاتباها في المكرونة بالبشامل )

7-    نحشي زي ما موضح في الصور.

8-    نحضر صلصه و فيها بصل و جزر مبشور و ملح و فلفل و نسبكها شويه علي النار ( معلش صورت الحله بعد ما سقيت الكنالوني )

9-    نصبها علي الكنالوني و نرش جبنه ( ممكن تغطيها بصوص البشامل )

10-                       نسويها في الفرن لمده 20 ساعه أو لحد ما وشها يتحمر شويه ,

11-                       نقدمها مع بطاطس بيوريه و كول سلو .

يا رب تكون عجبتكم

كرات اللحم

السلام عليكم 

دي كرات اللحم ... هيا غير الكفته بس طريقتها حلوة و كمان سهله

المقادير :

نص كيلو مفروم / ½ كوبايه جبنه بارميزان أو تركي / ¼ كوبايه بقسماط ناعم / بيضه / ملح و فلفل و بهار / زعتر بري / 2 م كبيره بقدونس مفروم / طماطم معصورة و صلصه / بصله مفرومة ناعم / 2 فص توم مدقوقين ناعم

الطريقه :

1-     حنخلط كل المقادير سوا و بعد كده نعمل الكفته كور .

2-     نسويها في الفرن أو في الطاسه زي ما أنا عملت كده.

3-    نجيب حله تانيه و نحط فيها زيت و بصله و التوم و نسيبهم يدبلوا شويه و ملح و فلفل.

4-    نحط الصلصه و الطماطم.

5-    نسيبها تتسبك و تتقل كده .

6-    نضيف اللحمة و نسيبها فيها ¼ ساعه.

7-    نسلق المكرونة الأسباجيتي و نقلبها في شويه زيت بعد ما تستوي و نشطفها يعني.

8-    نغرف مكرونة و عليها اللحمة بالصوص كده.

يا رب تكون عجبتكم.

أرز الصياديه (طريقه تانيه)

الوصفه دي من shimaafifi   حبيبتي من منتدي عروس

المقادير  :

   3 بصلات وسط مقطعين

3 كوبايات رز

جزره مبشوره

ربع كوب زيت

ملح وفلفل وبهارات

معلقة دقة توم(توم +ملح+ فلفل اخضر+ كمون+فلفل اسمر+كرفس  (

الطريقه :

1-    هانحط الزيت عالنار وبعد كده البصل الى ان تصبح باللون الدهبىثم نضع الجزر والدقه ثم نقلب الى ان يصبح اللون بنى غامق.

2-    نضع مقدار الماء 3 كوب ونص.

3-    الى ان يغلى ثم نضع الملح والفلفل والكمون والبهارات وورقة لورى.

4-    ثم الارز ونتركه يغلى ونهدى النار عليه الى ان ينضج.

يا رب يكون عجبكم

الأرز الصيادية

السلام عليكم يا قمرات

دي طريقه الآرز الصياديه بتاعتي و ان شاء الله في طريقه تانيه حأنزلها كمان حنشوفها بأسمها ان شاء الله

المقادير :

كوبايه رز / بصله صغيرة مفرومة ناعمة / زيت / ملح و كمون و لومي / ماء

الطريقه :

1-    نحط الحله فيها زيت و نحط البصله .

2-    نحط كمون و لومي مطحون .

3-    نقلب في البصله لحد ما لونها يغمق بس مش يتنحرق يعني.

4-    نحط الميه و ننزل الرز و ندوق الملح.

5-    نسيبها تغلي و نوطي عليها و نحط الشياطة.

6-    لما تتشرب نقدمها مع سمك مقلس.

يا رب تكون عجبتكم

الدجاج المشوي

السلام عليكم يا قمرات

النهارده معانا فراخ الأزازه عشان ساعات بنستعمل ازازة بيبسي فاضيه و نعبيها ميه بدل الشوايه اللي في الصورة ......... المقادير دي شوفتها في فتافيت و جميله قوي

القادير :

فرخة كيلو و نص / ليمونتين كبار / خل / ملح و فلفل و زعتر بري و بابريكا / صوص الصويا

الطريقه:

1-نخلط الليمون و الخل و البهارات و صوص الصوويا سوا .

2- نغسل الفرخة كويس طبعا و نتبلها بالتتبيله دي.

3- نحطها زي الصورة كده و ندخلها الفرن و كل شويه نمسخحها بالتتبيله و لما تستوي ندهنها بالزبده عشان تتحمر .

يا رب تكون عجبتكم

مكرونة بالبشامل

السلام عليكم يا قمرات

مكرونة بالبشامل بطريقه جديده ممكن يكون حد فيكم عارفها بس بالنسبه لناس تانيه جديده و جميله و خفيفه.

المقادير:

1-    نص كيلو مكرونة فرن .

2-    مقادير اللحمة المفرومة : ¼ كيلو مفروم / 2 جزرة مبشورة ناعم / 2 بصله متوسطة مفرومة / ملح و فلفل و صويا صوص و قرفه.

3-    مقادير البشامل: 10 ملاعق دقيق / 5 ملاعق زبده / 6 كوبايات لبن / بيضه / ملح و فلفل

4-    صلصه للمكرونة.

الطريقه :

1-    حنجيب حله نعمل فيها المفروم حنحط بصله مفرومة ناعمه و نسيبها تدبل .

2-    نحط البهارات و شويه فلفل أسمر عشان مش نعيط ( ههههههههه ) .

3-    نحط اللحمة و نظبط الملح و نضيف الجزر المبشور و نسيبها تستوي علي النار .

4-    نسلق المكرونة و نصفيها و نشيلها .

5-    نعمل صلصله للمكرونة و نقلبها و نضيف اللحمة و نقلبهم سوا.

6-    نعمل البشامل : نحط الزبده تسيح و نضيف الدقيق .

7-    نقلب لمده 3 دقايق أو الدقيق حيصفر.

8-    نحط اللبن و نقلب في نفس الوقت عشان مش يكلكع أو يعمل كتل.

9-    نحط البيضه و نقلب بسرعه و بعد كده نضيف الملح و الفلفل.

10-   أنا بحب أضربه بالمضرب االلي في الصورة عشان أضمن انه مفيش كتل ( ممكن تعملي كده في الخلاط )

11-   نحط المكرونة في الصينيه و نصب فوقها البشامل و نبشر جبنه لو تحبي.

12-  نحطها في الفرن ما بين نص ساعه أو ساعه الا ربع حسب فرنك .

يا رب تكون عجبتكم

سمك بالصلصه

السلام عليكم يا قمرات

النهارده معانا وصفه حلوة قوي و سهله كمان و تغيير عن كل مرة سمك مشوي أو مقلي ....النهارده معانا سمك بلطي بالصلصه .......اتعملتها من حماتي ربنا يخليها

المقادير:

زي ما انتوا شايفين في الصورة سمك بلطي / توم مدقوق و محطوط عليه ملح و كمون و ليمون و كزبرة ناشفه و طبعا شطة بس أنا مكنشي عندي / بصل مفروم ناعم / صلصه أم طماطم مضروبه في الخلاط

الطريقه:

1-نغسل السمك كويس و نتبله باتوم المدقوق و نرش عليه ملح ( دي فكرة حماتي ربنا يخليها ) و نسيبه فترة.

2 – نتبل السمك بالدقيق و نقليه.

3- نحضر الصلصه كالأتي:

1-       نحط زيت في الطاسه و نحط البصل يدبل و بعد كده نحط التوم اللي هو باقي من الدقه اللي تبلنا بيها السمك.

2-       لما تدبل البصله و تشمي ريحه الدقه ياااااه جامده جدا تحطي الصاصه أو الطماطم برضه.

3-       و شويه ميه و ملح و فلفل مش تكتري دوقي و زودي حسب الحاجة.

4-       و لما تتسبك كويس نحط السمك و يغلي غلوة و نقلبه و يغلي غلوة و نطفي النار نقدمه بقه مع سمك أبيض و بالهنا و الشفا .

يا رب يعجبكم

مقلوبه اللحمة

السلام عليكم يا قمرات

النهارده معانا مقلوبه أكله جميله و سهلة كمان

المقادير :

نص كيلو لحمة / بتنجان رومي كبيره / 5 حبات بصل متوسطين زي اللي في الصورة / 3 م ص كركم / ملح و فلفل / 2 كوبايه رز

الطريقه:

1-       حنسلق اللحمة ¾ سلق

2-       نشيلها من الشوربه عشان مش تكمل سواها في الشوربه و تتهري

3-       نقطع البتنجان و نقليه

4-       نقطع بصل زي كده و نغسل الرز

5-       نجيب حله نحط فيها شويه زيت و البصل و 3 م ص كركم و نقلب و نحط الرز و نقلب

6-       حتلاقي الخليط نشف نطفي النار

7-       نجيب الحله اللي حنعمل فيها نرص اللحمة و بعد كده بتنجان و خلطة رز و بتنجان و باقي الخلطة

8-       نجيب الشوربه و نظبط ملحها و نعاير للمقلوبه كأنك بتعايري شوربه للرز عادي

9-       و أول ما تغلي نوطي النار مش قوي و لما تتشرب نحط الشياطة و نسيبها علي راحتها

10-    لما تستوي نسيبها ترتاح 10 دقايق ( في الصيف طبعا )

11-    نقلبها زي كده

يا رب تكون عجبتكم