الزعتر البري
السلام عليكم يا قمرات
معنا النهارده الزعتر البري اللي هو الآوريجانو .....ريحته جميله و ورقه صغير قوي فيه منه ورق و فيه منه بودره ... أنا بستخدم الورق و بفركه فوق الأكل هو طعمه حلو جدا مع الصلصات خصوصا في البولونيز و صلصه البيتزا كمان و صوص المكرونة.
سلام و مع أعشاب تانيه
الشبت
السلام عليكم يا قمرات
معانا النهارده الشبت أو شبنت علي حسب حبايبنا في الخليج ما بيقولوا .......أخضر و جميل و بيستعمل طبعا مع كفته الرز و خلطة المحشي و فيه ناس بتحطوا علي السلطة هو حلو و كمان بيقوي الذاكرة و حلو كمان في تتبيلات الأسماك و الأكلات البحريه.
سلام و مع أعشاب تانيه
النعناع
السلام عليكم يا قمرات
معانا النعناع الأخضر يا حلاوته في الشاي طبعا حاجة مفيش بعد كده .... و بيتحط علي خلطة المحشي و أنا بحطه علي سلطة الزبادي و الخيار و كمان مشروب الليمون بالنعناع جميل و النعناع الدافي حلو للمغص و ممكن يكون أخضر أو ناشف بتجيبي ربطة النعناع الأخضر و تغسليها كويس و تعلقيها في أي مسمار قرب الشباك في المطبخ أو البلكونة و تسيبيها لحد ما تنشف و تخزينيها في برطمان مقفول كويس عشان الريحة تقضل فيها
سلام و مع أعشاب تانيه
الريحان
السلام عليكم يا قمرات
النهارده معانا الريحان ... كلنا سمعنا عنه من قناه فتافيت و الطليان اللي بيحطوه علي كل حاجة ... لونه أخضر و ريحته مميزة و بيستعمل أكتر حاجة مع الصلصات بيديها ريحه و طعم حلو قوي و كمان مع البيتزا ..انتوا تعرفوا بيتزا مارجريتا اتسمت كده ليه؟؟؟؟؟؟؟ عشان الطليان حبوا يقدموا بيتزا تعبر عن بلدهم و ألوان العلم بتاعهم لملكه انجلترا مارجريت فعملوا صلصه و جبنة و ريحان هيا دي مكونات البيتزا و ألوان علم ايطاليا.
فيه منه طازج و فيه مجفف عند العطار و ممكن تحطيه علي التتبيلات.و فيه كمان صلصه البيستو اللي أساسها الريحان.
سلام و مع أعشاب تانيه
البقدونس
السلام عليكم يا قمرات
النهارده حنتكلم عن البقدونس أنا أختارت أنزله بعد الكزبره عشان تعرفوا الفرق أصلي مكنتش بعرف أفرق بينهم هههههههه.....البقدونس ورقه بيكون لحد الساق و له ريحه حلوة.
بيستخدم مع السلطات و يا سلام مع طبق جبنه قريش و خيار و طماطم ههههه بيكون حلو قوي و بيتحط مع سلطة البطاس اللي موجوده في السلطات.... مهم جدا في خلطة المحشي زي ما انتوا عارفين.
برضه ممكن يتخزن في الفريزر بعد ما يتفرم و في التلاجة في زجاجه فيها ميه و متلبسه بالبلاستك.
سلام و مع أعشاب تانيه.
الكزبرة الخضراء
السلام عليكم يا قمرات
طبعا ده يعتبر أعشاب مش توابل ..... بيختلف عن البقدونس انه الورق مش بيكون لحد تحت في الساق و باين في الصورة . جميل جدا مع الأسماك و السلطات
ماما الله يرحمها كانت بتستعملها مع الملوخيه بتدي لون حلو و مش بتيان في الطعم. و طبعا الكزبره أساس في خلطة القلقاس ..... ممكن تفرميه ناعم و تشيليه في الفريزر .
لو عايزة تحتفظي بيه فترة في التلاجة حطيه في زجاجة فيها ميه في باب التلاجة و لبسيه كيس بلاستك و حيقعد معاكي كام يوم ان شاء الله.
سلام و مع أعشاب تانيه.