خيار مخلل

السلام عليكم

تعرفي علي طريقة تخليل الخيار بطريقة سهلة و نتيجة مضمونة

المقادير:

كيلو خيار / لتر ماء / 2معلقة كبيرة خل / 3 معلقة كبيرة ملح / 3 فص ثوم

الطريقة:

1-    نغسل الخيار جيدا و نحضر الوعاء الذي سنقوم بالتخليل به .

2-    نرص الخيار و نضيف قطع التوم .

3-    نعاير لتر الماء و عليه 3 ملعقة كبيرة ملح و نذيبها جيدا و بعد ذلك نضيف الخل.

4-    نصب الماء علي الخيار بحيث  يغطيه تماما  و نغلق الوعاء جيدا و نتركه 3 ايام الي أن يتخلل .

طريقه عمل صوص الكراميل

السلام عليكم

المقادير:

كوب و نصف سكر / نصف كوب كريمة سائلة أو لباني

الطريقة :

1-    نحضر طنجرة و نضيف السكر  و نتركها  علي النار بدون اضافة اي سوائل و نراعي عدم التحريك بالملعقة.

2-    نتركها تغلي .

3-   عندما  يتغير لونها الي الاصفرار .. ننقلها بعيد عن النار و نصب الكريمة السائلة و نقلب بسرعة .

4-    نعيدها علي النار  مرة أخري  و نتركها تغلي لمده ثواني و بعد ذلك يكون جاهز

طريقة عمل كريم شانتيه البودرة 

السلام عليكم 

المقادير :

11 معلقة صغيرة  بودره كريم شانتيه / 2 معلقة كبيرة سكر حبيباته ناعمة لو الكريم شانتيه خام/ كوب لبن 200 مللي بارد جدا

الطريقة :

1-   نخلط البودرة و السكر.

2-    نضيف اللبن .

3-    نضرب بالمضرب الكهربائي لمدة لا تقل عن 3 دقايق الي أن بتماسك و يصل للسمك المطلوب .

طربقة تخزين الكرنب

حنقطع الكرنب كما هو موضح الصوره و بعد كده نقطع العرق السميك اللي في الورقة 

و نحضر ماء ساخن بملح و كمون  و نبدأ نسلق الورق لمدة 5 دقايق لو الورقة سميكة و أقل لو الورقة رقيقة

و نصفيها علي مصفاة و نسلق الوردة المتبقية في الماء لمدة 5 دقايق

و نقطع الورق كما هو في الصورة

طريقه حفظ القرنبيط أو الزهره في الفريزر

السلام عليكم  

معنا طريقه حفظ القرنبيط بالصور و هو خضار شتوي ممكن صنع اطباق شهية باستخدامه .

الطريقه :

1-    نقطع القرنبيط زهرات زهراتمتوسطة الحجم .

2-    نغلي ماء  بملح و كمون .

3-    نسقط فيها الزهرات و نتركها لمدة لا تقل عن 10 دقائق و نختبر النضج بلمس الساق و الضغط عليه.

4-   نخرجها من الماء  و نتركها تبرد و تعبأ في أكياس و نخزنها في الفريزر.

رابع مرة 5 نصايح

السلام عليكم يا قمرات

1-    قبل ما تستخدمي البيكنج بودر اعملي اختبار لو حطيته شويه في كوبايه ميه و عملت فوران بسيط يبيقي هو كده كويس و لو لأ يبقي مش نافع.

2-    ممكن تسهلي علي نفسك الأمور و تعملي خلطة الشاورما فراخ جاهزة و تغليفيها في الفريزر و تستخدميها وقت ما تحتاجي.

3-    تسهيل الشغل عليكي ممكن تعملي لحمة مفرومة و تعبيها في علب تكفي للأستخدام مرة واحده.

4-    لما تسلقي البيض و عايزة تقشريه بسهوله حطيه في ميه بارده لمده 5 دقايق .

5-    عشان تصيعي ريحه السمك و انتي بتقلي هاتي حله صغيره حطي فيها ميه و فانيليا و سيبيها تغلي بالراحة و انتي بتقلي السمك و ان شاء الله مش حتلاقي ريحة.

طريقه حفظ ورق العنب

السلام عليكم

طريقة تخزين ورق العنب

1-    نرتب ورق العنب فوق بعضه و نكون منه ربطات كما هو موضح في الصورة.

2-    نغليماء في طنجرة ومجرد أن  تغلي نضع الورق و نقلبه سنجد لونه تغير الي أخضر غامق قليلا نتركه 1 دقيقة و نضعه في مصفي .

3-    نضع المصفي تحت الماء  المثلج حتي نوقف عملية الطبخ  .

4-      بعد ذلك نحفظه في أكياس بعد ما يبرد في الفريزر

طريقة حفظ الفاصوليا في الفريزر

1-    نغسل الفاصوليا و تقطع بالجنب قطع صغيرة او متوسطة علي حسب الرغبة.

2-    نحضر ماء في طنجرة  علي النار و ايضا مصفاة و ماء مثلج .

3-    عندما يغلي الماء نضع الفاصوليا و نتركها تغلي 3 دقايق.

4-    نخرجها من الماء الساخن و نضعها في ماء مثلج.

5-    و بعد ذلك نقوم بتصفيتها .

6-    نخزنها في أكياس في الفريزر عندما تهئ تماما و يستحسن ان لا يكون عليها ماء حتي لا يكون طبقة جليد .

تالت مرة 5 نصايح

السلام عليكم يا قمرات

1-     لو عندك غلايه ميه بالكهربا و كنتي عايزة تعملي مكرونة و مستعجله ممكن تغلي فيها الميه الأول مش بتأخد وقت و أسرع من البوتجاز.

2-     عايزة ريحه التوم تروح من ايدكي ... اغسلي ايدكي بصابونة و ادعكيها في حنفيه الحوض بتاع المطبخ أو الحمام و اشطفيها حتلاقي الريحة ان شاء الله راحت.

3-     أنا بستعمل العيش البايت بتاع الفرن بتاعنا البلدي العادي أقطعه و أقليه في الزيت و أستعمله مع شوربه العدس أو السلطات بيكون أخف من اللبناني عشان مش بيشرب زيت عشان الرده .

4-    أنا دايما بقطع فاكهة و أقشرها في كيس صغير و أربطه و أرميه في كيس الزباله الأساسي و كده مش بيلم هاموش خالص.

5-    عايزة البطيخه تفضل حلوة كده و مش تلقط ريحه من التلاجة لما تسيبيها حطيها علي طبق بالشكل ده و لما تقطعي منها حته حطي عليها كيس بلاستيك. ( دي طريقه ماما الله يرحمها )

5 نصايح

السلام عليكم يا قمرات

1-    لو حبيتي تعملي هامبرجر ممكن تيجبي غطا برطمان التانج و تلبسيه ببلاستك و تحطي فيه اللحمة و تبططيها كقرص و بعد كده تشيلي الورقه حيكون عندك قرص دائري مظبوط ( فكرة أخويا بس جديده ).

2-    دايما اتأكدي انك مغطيه الأجبان في التلاجة عشان مش تنشف.

3-    ممكن تشيلي عصير البرتقال و الأستفندي الفريش في الفريزر و تستعمليه بعد كده تسقي بيه الكيكه أو تعملي كيكه برتقال.

4-    عشان تعملي مارينج مظبوط لازم تكون السلطانيه و المضرب ناشفين تماما و مفيش فيهم نقطة ميه.

5-    لما يكون عندك وصفه فيها صفار و مش حتستخدم البياض ممكن تحتفظي بيه في الفريزر و تستخدميه مرة تانيه.

5 نصايح ( الجزء الأول )

السلام عليكم يا قمرات

معانا النهارده 5 نصايح ان شاء الله تستفيدوا منها ......... علي فكرة أي نصيحة أنا بقولها حأكون مجرباها بنفسي .

1. لما تحتاجي تعملي عيش بيتي و محتارة في موضوع الملح ......... حماتي ربنا يخليها قالتلي حطي ميه و عليها ملح و ظبطيه و اعجني بيه حيكون العيش ملحه مظبوط و فعلا كان كده.
2. لو عندك زيت و مضايقه من ريحته و ممكن تقدري تستخدميه تاني ............ حطي فيه حته لقمة عيش و سيبيها تتحمر و حتلاقي الريحة راحت.
3. لما تطلعي صينيه سخنة من الفرن اوعي تمسكيها بفوطة مبلووله حتلاقي الفوطة سخنت و بعد الشر اتلسعتي.
4. لما تيجي تدمسي فول اوعي تفتحي عليه كل شويه و تقلبي عشان مش يسود و كمان مش تحطي كميه صغيره في دماسه كبيره عشان مش حيستوي قوي.
5. لما تيجي تشتري معلبات لازم تأخدي بالك من تاريخ الأنتاج و الأنتهاء و مش تشتري أبدا العلبه الي شكلها مش مظبوط أو مخبوطة من الجنب عشان كده غلط.

أسيبكم دلوقتي و مرة تانيه مع 5 نصايح

بسم الله الرحمن الرحيم

الموضوع ده ان شاء الله تستفيدوا منه و صدقوني لو نفذتوه أو أخدتوا الأفكار اللي تناسبكم أكيد بأذن الله حتلاقوا نتايج مبهرة
أول ما نبدأ اتمني منكم ان شاء الله الألتزام باللي في الموضوع عشان محدش يقولي مش ظبط معايا و ان شاء الله ربنا يجعلني سبب في استفادتكم و مش تنسوني بدعواتكم.......... أول حاجة في عده خطوات لازم نعملها نبدأ يللا


مقارنة الأسعار و المكونات
شوفوا يا حلويين هاتوا ورقه و قلم و شوفوا انتوا بتجيبوا ايه من خزين للبيت و شوفوا أسعار الحاجات بالمقارنة بأنواع تانيه ليها نفس الجودة مثلا أنا كنت بجيب زيت كريستال ب 11 جنيه فكرت أشوف أنواع تانيه بدأت أدور لاقيت زيت الأصيل اللي ب 7 جنيه نفس الشركة و نفس المكونات .... و بدأت أجيبه و لاقيته زيه تمام مافيش أي فرق ده حتي نفس الشركة و جربوه و قولولي  .

مصروف البيت معاكي و بس
يعني انتي مسؤوله تيجيبي عشان الرجاله مش بيفرق معاهم حاجة أنا عمري ما طلبت حاجة من جوزي و لاقيته عارف سعرها كام ....... زمان كنت أنزل أجازة من الكويت و هو هنا الاقيه ممون البيت ب 400 جنيه و لسه مش جبنا لحمة و لا فراخ و لا خضار و لا سمك قولتلو لالالالالالالالالا لما أجي ان شاء الله نجيب سوا و كنت أجيب بكام ب200 جنيه و الله ههههههه


مافيش حاجة تترمي
أنا عمري ما رميت أكل الا في النادر و أي حاجة تنفع تتحط في الفريزر بحطها و أستفيد منها تاني . حتي العيش أو الفينو بستخدمو بقسماط ... خليكي ناصحة و مش ترمي حاجة و الا عايزة أقولها تعمل ايه باحاجات دي معنديش مانع و الله ,,,, الفريزر مليان عندي أكياس و علب صغيرة فيها حاجات وقت الزنقة بطلعها و أشوف فيها و أركبه علي اللي عندي و أمشي نفسي.


صنع ايديا و حيات عنيا :
أي حاجة بستهلكها كتير و ممكن تتعمل في البيت مش بشتريها من بره خالص......... زي الطحينة و البقسماط أو أي حاجة ليها علاقة بالحلويات

متابعة العروض :
أنا بتابع العروض اللي علي النت أول بأول و بحب أجيب طلباتي من فتح الله عشان بجيب حاجات كتيرة ي ........ و لو فيه عرض فيه عبوه أكبر أو ممكن أستعمله كام شهر بجيبه و أخد من معايا( فلوسي أنا يعني ) و لما أحتاجه الشهر اللي بعده أخد من المصروف و أرجعهم مثلا لقيت فتح الله عامل مناديل 3 ب 10 جنيه و هي أصلا ب 15 جنيه و أنا بستخدم كل شهر واحد يعني مفروض أدفع 3.50 كل شهر أقوم أدفع 7 جنيه من معايا و أحطهم الشهر اللي بعده فاهمني؟؟؟؟؟؟؟؟؟

جنيه و اتنين بيقرقوا:
مش تقولي يعني ايه جنيه لأ بيفرق عشان هو مش بيكون جنيه و بس لأ بيكون جنيه هنا و جنيه هناك و هكذا

الفسح و الأولاد
كل واحده عارفة ولادها لما بتخرج بيحب يأكلوا ايه أنا واحده مقاطعة كل البضايع و محلات الأكل الأمريكيه فبحتار مع ولادي فا دايما بجيب كل شهر كيس ثري شيفس نجتس الكيلو و أخلي لما أجي أخرج أعمل شويه مكرونة مش حيأخدوا وقت و أحمرلهم نجتس يا اما ساندويتشات و أخد معايا الميه بتاعتهم كمان أهو تمن الأكل يلعبوا بيه في الألعاب و الا ايه

تنويع الأكل و الكميات
تنويع الأكل فبي المرة الواحده بيخليكي تستخدمي كميات أقل من الحاجات اللي بتكون غاليه يعني مثلا لكيلو الجمبري ب 80 جنيه عملت ايه جبت جمبري صغير و عملته سلطة أو حطيتوا علي الرز و المحصلة واحده أكلت جمبري و لا ما أكلتش ههههه أكلت و الله ههههههه علي فكرة الجمبري بالذات من كتر حبي ليه بستهبل علي جوزي كل ما يقولي عايزة حاجة أقوله أه جمبري و كتييييييير بيجبلي بجد ههههههههههه

الصدقة
و دي حاجة مش محتاجة كلام يا بنات أول ما تمسكي المصروف شيلي جزء علي جنب و صدقيني حتحسي بالفرق و يكفي قول الرسول عليه أفضل الصلاة و السلام (( ما نقص مال من صدقة ))


الأولاد
أولادي الحمد لله اتعودوا يأكلوا كل حاجة ما فيش حاجة مش بيأكلوها
حتي لو مش بيأكلوا حاجة معينة مقليه مثلا ممكن يأكلوها بشكل تاني و بيشربوا لبن و بيأكلوا فاكهة و ده أهم حاجة عندي و دايما تلاقي عندي نوعين فاكهة و الحمد لله و لما يخلصوا أجيب نوعين مختلفين و بين الوجبات فيه لبن و فاكهة و خضار و ده أفيد حاجة و الا ايه؟؟؟؟؟ الأولاد اتعودوا زيي يأكلوا كميه الرز قد كميه الخضار و لازم يكون فيه سلطة و يأكلوها كمان و كل ده بالتعود.


اكتبي كل حاجة:
أنا عندي أجنده بكتب فيها كل حاجة بصرفها عشان أعرف الخلل فين و أعرف كمان الأسعار لو من مكان لمكان بتختلف و الا ايه


اختاري الأريح و الأحسن
كنت قبل كده بجيب حاجتي من عند حماتي من السوق لما فتح جنبي فاكهاني و خضار بقيت بجيب من عنده أي نعم أغلي بس مش بجيب كميات زي الأول بجيب علي قدي فا مفيش حاجة تترمي الحمد لله و كنت بجيب لحمتي من كارفور لما جربت جزار أخت جوزي لقيته ممتاز و أرخص قلت خلاص أنا كده كده بروحلها مشي و معايا عربيه زياد يبقي أنا أوللي بالفرق و بجيب من عندها

أتمني انكم تكونوا استفدتكم يا بنات و أي استفسار أنا جاهزة و يا رب مش تنسوني من دعواتكم ليا و لجوزي و أولادي ربنا يهدينا و يصلح من حالنا كمان و كمان