الحبهان
السلام عليكم يا قمرات
معانا النهارده بهار الحبهان و أخواننا في الخليج بيقولوا عليه هيل ... الحبهان فيه منه حب أو مطحون و بيستخدم أساسي في الشوربه بتاعه اللحمة و الفراخ عشان بيضيع ريحة الزفاره و موجود في التتبيلات بتاعه اللحمة و الفراخ و أخواننا في الخليج بيستخدموه في الحلويات و في القهوة العربي
سلام و مع بهار تاني
الكركم
السلام عليكم يا قمرات
النهارده حنتكلم عن الكركم هو بهار لونه أصفر و بيصبغ الأكل يعني يخلي الأرز لونه أصفر بيستخدم في المقلوبه و عمل تتبيلات للفراخ و طعمه مزز يعني مش نكتر منه في الأكل و كمان مهم جدا للجسم عشان بيقوي المناعه في جسم .
سلام و مع بهار تاني
جنزبيل
السلام عليم يا قمرات
معانا النهارده بهار هو الجنزبيل ......... منه طبعا فريش و منه بودره و له طعم لاذع يعني نأخد بالنا لما نستعمله مش نستعمل كتير .... بيستعمل في تتبيلات اللحوم و الفراخ و بستعمله في شوربه اللحم و الفراخ
سلام و مع بهار تاني
الكزبره الناشفه
السلام عليكم يا قمرات
النهارده معنا بهار و هو الكزبره الناشفه... ممكن طبعا تكون حب و بنلاقيها كده في عجينة الفلافل و ممكن تكون مطحونة .... نستخدمها في الملوخيه أساسي و في دقه التوم بس مش مع الفته يعني و بنستخدمها في تتبيله سلطة الطحينه و أساسي في تتبيله الأسماك و كمان في بهار اللحمة و الفراخ و بحط منها علي الفاصوليا الخضرا الطبيخ.
يستحسن تطحنيها في البيت عشان تكوني ضامنه انها نضيفه و مفيش فيها شوائب
سلام و مع بهار تاني
القرفه
السلام عليكم يا قمرات
معانا النهارده بهار هو القرفه......... القرفه معروفه انها عيدان أو مطحونه ... تستعمل كمشروب و هيا مكون أساسي في تتبيلات السمك و الفراخ ليها ريحه مميزة و طبعا معروفه في السينابون و بسكويت القرفه بس لو زادت في الأكل بتدي لسعه كده. جربوها مع عصير التفاح الدافي مشروب حلو قوي في الشتا .
سلام و مع بهار تاني
بودره الكاري
السلام عليكم يا قمرات
النهارده معانا بهار هو الكاري طبعا أكيد عارفينه من الهنود ههههههههههه هو جميل في التتبيلات مع الفراخ أكتر حاجة ممكن تشتريه جاهز و ممكن تعمليه عشان هو مجموعه بهارات سوا :
ملعقة طعام مسحوق الكزبرة
- ملعقة شاي مسحوق الكمون
- ملعقة شاي مسحوق الكركم
- 2/1 ملعقة شاي فلفل حار أحمر
- 2/1 ملعقة شاي مسحوق زنجبيل
- 1/4 ملعقة شاي مسحوق الهيل ( حبهان )
أنا بستخدمه مع الفراخ و الرز و بيكون طعمه جميل جدا
السماق
السلام عليكم يا قمرات
النهارده معنا نوع من التوابل ...السماق هو لونه أحمر و طعمه مزز.. بيستخدم أكتر حاجة في بلاد الشام بيحطوه علي المقبلات والسلطات خاصه الفتوش و مع المشويات بيدي مزازة و كمان مهم جدا في أكله المسخن اللي هيا بصل و سماق و زيت زيتون و فراخ في عيش.
ماما الله يرحمها كانت بتستخدمه في معجنات السبانخ طعمه جميل مع زيت الزيتون.
سلام بقه مع بهار تاني
الكمون
السلام عليكم يا قمرات
هو لونه بني , ممكن تشتريه حب أو مطحون و الأفضل تطحنيه في البيت عشان لما بتشتريه حب بيكون محتاج يتنقي من الشوائب.
هو حبيب الأسماك و المأكولات البحريه ... بيكون موجود في تتبيله الفراخ و اللحوم بس بنسبه قليله.... و مهم مع التوم و الآرز الصياديه.
سلام و مع بهار تاني
السلام عليكم
الفلفل الأسود
هو بهار مهم جدا خاصة مع اللحوم و الدجاج و يستخدم في صنع صوص الفلفل الاسمر من المطبخ الفرنسي .
اذا تم شراؤه حب صحيح يجب مراعة عدم طحنه خشن حتي لا يسبب أذي لأاي فرد او طفل او يسبب الاحراج في عزومة ما اذا كان الشخص لا يتقبل طعمه الحار في فمه
الفلفل الاسمر له استخدامات متعددة .. يمكن وضعه حبوب صحيح في خزانات التموين حتي يحافظ عليها من السوس و الحشرات .. ممكن وضعه في السجاد قبل القيام بتخزينه لمثل نفس السبب
و مع بهار آخر