باستا بالهوت دوج

وصفة شهية و سريعة بمكونات متوفرة في بيوتنا و تصلح للعشاء أو غذاء سريع و طعمها شهي  جدا

المقادير:

لينجويني باستا  /  نصف كيلو سوسيج أو ما يعرف بالهوت دوج / فلفل رومي أخضر و أحمر , اصفر / 2 بصلة متوسطة مقطعة الي جوانح  / صلصة طماطم  / ملح و فلفل / زيت نباتي  / نصف كوب ماء 

الطريقة :

1-     نسلق المكرونة و نصفيها و نتركها علي جنب.

2-     نحضر الطاسة و نضع فيها قليل من  زيت  نباتي و نضع البصل و نتركه حتي يتكرمل مع اضافة قليل من الماء كل فترة.

3-    نضيف الهوت دوج الشرايح و نحرك جيدا.

4-    نضيف الفلفل الرومي الألوان  حسب الرغبة و نقلب .

5-    نضيف الصلصة و نصف كوب من الماء و نقلب و نتبلها ملح و فلفل.

6-    نسخن الباستا بقليل من الزيت أو الزبدة و نضيف لها ملح و فلفل و زعتر جاف .

7-    تقدم ساخنة بجانب طبق من الشوربة أو السلطة  .

طبيخ السبانخ

السلام عليكم يا قمرات

النهارده معنا سبانخ مخصوص لحبيبتي أم جوجو عشان طلبتها بالتفصيل و هيا ممكن تتعمل بالطريقه دي و تتأكل دايت.

المقادير :

½ كيلو سبانخ / شوربه لحمة أو فراخ / 2 م كبيره رز / طماطم معصورة مع 2 م ك صلصه / ملح و فلفل / حزمة كزبره خضرا صغيره./ بصله صغيره مفرومة

الطريقه:

1-     ننضف السبانخ و نرمي الورق الأصفر منها و الجذور نقطعها و تكون زي الصورة.

2-     نغسلها كويس جدا عشان بيكون فيها طينة .

3-     نحضر الشوربه علي النار و نضيف ليها الطماطم المعصورة و نسبها تتسبك شويه .

4-     نقطع السبانخ زي الصورة كده و نقطع معاها حزمة الكزبره..

5-     نضيفها للشوربه ( هيا من الأول فيها البصل ) .

6-     نقلبها و بعد كده نضيف الأرز بدون ما نقلب الأرز عشان لو قلبناه حينزل تحت و يلزق في قعر الحله.

7-    لما الأرز يستوي نقلبها و ندوق ملحها و تتقدم .

يا رب تكون عجبتكم

طاجن البامية باللحمة

السلام عليكم يا قمرات

النهارده معانا طاجن باميه باللحمة مفيش أسهل و لا أحلي من كده

المقادير :

½ كيلو لحمة موزة / ½ كيلو باميه متقمعه / بصله متوسطة مفرومة / 3 فصوص توم كبيره مفرومة / ملح و فلفل و بهار / زيت / طماطم معصورة / صلصه

الطريقه:

1-     حنحط زيت في الحله و نشوح البصل و لما يدبل نضيف التور .

2-     نحط عليهم فلفل أسمر و نحط الباميه و نقلبها في البصل و التوم.

3-     نحط عصير الطماطم و م كبيره صلصه و الملح و البهار.و نسيبها تأخد غلوتين علي النار.

4-     نحضر الطاجن و نرص فيه اللحمة اللي سلقناها قبل كده.

5-     نحط عليها الباميه و ندخلها الفرن.

6-     لو الفرن حامي نغطيها بورق فويل و لما تستوي نشيله عشان تأخد لون.

7-    و نقدمها مع رز بالشعريه أو عيش بلدي.

يا رب تكون عجبتكم

كباب حلة

تطبيقي لوصفة الشهر في جروب النملية من وصفات المطبخ المصري 

المقادير :
نصف كيلو لحم بقري مقطع مكعبات صغيرة.
نصف كيلو بصل مفروم.
ملعقة كبيرة سمن.
ملعقة كبيرة زيت.
ملح و فلفل أسود.
٢ كوب ماء مغلي.

الطريقة :
١. في وعاء على حرارة متوسطة نضيف السمن والزيت و نشوح(نحمر) قطع اللحم تدريجيا وليس كل الكمية مرة واحدة،حتى لا تنخفض درجة حرارة الوعاء(الحلة)ويخرج اللحم سوائله وعصارته.
٢.نشوح اللحم من جميع الجهات مع إضافة رشة من الفلفل الأسود.
٣. نضيف البصل ونحركه مع اللحم حتى يأخذ لون ذهبي ويعطي مذاق جميل للأكلة.
٤. نضيف كوب من الماء المغلي ونغطي الوعاء،ويترك على حرارة هادئة حتى يتشرب الماء مع متابعته من وقت للثاني.
٥. نضيف الكوب الثاني من الماء المغلي،نغطي الوعاء ونتابع كمية السوائل،حتى لا تجف وتحترق اللحمة من الأسفل في الوعاء.
٦.نضيف الملح ويترك اللحم حتى ينضج

شيش طاووق

السلام عليكم يا قمرات

النهارده معانا شيش طاووق حلو و سهل و سريع كمان

المقادير :

1 كيلو وراك مخليه / ملح و فلفل و صوص صويا و صلصه و غصير ليمون و زعتر بري و لبن / فلفل رومي مكعبات و بصل مكعبات حسب الرغبه

الطريقه:

1-    حنخلط م ك صلصه مع نص كوب لبن و ملح و فلفل و قرفه و بابريكا و صوص صويا و عصير ليمونة و زعتر بري.

2-    نقطع الوراك قطع متوسطة مش صغيره عشان مش تنشف.

3-    نسيبها في التتبيله ساعتين .

4-    نسخن الجريل أو الطاسه الجريل و ندهنها زبده .

5-    نبدأ نشوي الالفراخ و هيا مش يتأخد وقت .

6-    في الأخر أنا رصيتها و حطيت حته فحمة سخنة جدا و عليها حته زبده أو م ك سمنة و قفلت الجريل و سيبتها تأخد ريحه الشوي.

7-    تتقدم مع رز و فرايز.

يا رب تكون عجبتكم

لحمة بارده ( عرق روستو )

السلام عليكم يا قمرات

معانا عرق روستو ممكن يتعمل منه لحمة بارده و روست بيف .

المقادير:

عرق روستو أي حجم /بطاطس و جزر / فصوص ثوم / ملح و فلفل و قرفه و بابريكا و صوص صويا و كاتشاب و بابريكا .

الطريقه:

1-     حنحضر التتبيله نحط كل الحاجات علي بعض و نسيبها.

2-    حنقطع فصوص التوم و نعمل خروم في كذا مكان و نحط فيها فصوص الثوم.

3-    حنتبل العرق بالتتبيله اللي عملناها .

4-    حنسيبها كام ساعه .

5-    نجيب صينيه و نحضرها علي النار و فيها حته زبده.

6-    نشوح اللحمة من كل النواحي و نديها لون تحمير.

7-    نحضر الجزر و البطاطس شرايح و نتبلها ملح و فلفل.

8-    نرص الخضار و فوقيه اللحمة و ندخلها الفرن.

9-    نغلفها و نسيبها مش أقل من ساعتين.

10-  نسيبها تهدي 10 دقايق قبل التقطيع .

يا رب تكون عجبتكم

أسكندر كباب

السلام عليكم 

الأكله دي تركيه بتتعمل من شرايح الشاورما بس بجد روعه جوزي أكلها في تركيا و فعلا جميله و سهله قوي

المقادير :

½ كيلو لحمة ستيك / 3 طماطم متقشرين و معصورين /عيش أبيض بلدي / زبده / ملح و بهارات / زبادي

الطريقه:

1-     حنقطع اللحمة شرايح زي الشاورما .

2-    حنحضر زبده في الطاسه و ننزل باللحمة و نحط عليها فلفل و قرفه و بابريكا أو بهارات لحمة .

3-    نسيبها تستوي و كل شويه نزودها ميه لحد ما تستوي.

4-    نحضر الطماطم و نقشرها و نضربها في الخلاط.

5-    نحطها علي النار و نتبلها و نحط عليها حته زبده.و نسيبها لحد ما تتسبك و ميتها تنشف.

6-    نقطع العيش مثلثات .

7-    نحضر الطبق نحط العيش و بعد كده اللحمة و نحط عليها الصلصه و الزبادي علي الوش و معاها زبادي.

8-    تتقدم سخنة و معاها سلاطات أو مقبلات

يا رب تعجبكم

ريش لحم مشوية

ر

ريش مشوية بطريقة شهية جدا و تقدم مع الارز البسمتي أو خبز و سلطات

المقادير:

  كيلو ريش ضاني

  ملح و فلفل و بابريكا مدخنة

   2 ملعقة كبيرة بصل بودر 

  2 م بهارات لحم

  خل و عصير ليمون 

 2 طماطم معصورة بدون القشر

2 مكعب زبدة و 1 ملعقة كبيرة زيت زيتون 

ماء ساخن

الطريقة:

1- في وعاء نضع جميع مكونات التتبيل ما عدا الزبدة و الزيت و الماء و نخلطها جيدا و نختبر الملح .

2-  نضع شرائح اللحم و نقلبها جيدا و نتركها في الخليط مدة لا تقل عن 24 ساعة حتي نحصل علي نتيجة ممتازة.    

3-  في طاسة تيفال كبيرة نضع الزيت و الزبدة .

4-  نتركها حتي تسخن جيدا و نضع القطع و نراعي ان يكون العدد قليل .   

5-   علي نار هادئة نقلبها من الجهتين حتي تأخذ لون التحمير ثم نضعها في صحن جانبي.

6-    نكرر نفس الخطوة مع باقي القطع .

7-  يمكننا نكملة التسوية في الطاسة أو رصها في صينية الفرن .

8-  اذا اردنا تكملة التسوية في الطاسة نراعي كل فترة نضيف ماء ساخن و نغطيها علي نار متوسطة حتي تنضج.

9-  اذا أردنا تكملة التسوية في الفرن نرصها في صينية الفرن و نضع قليل من الماء الساخن و نغطيها بورق فويل أو غطاء و نتركها لمدة لا تقل عن ساعة .

بطاطس و كوسا محشية لحمة مفرومة

 السلام عليكم 

النهارده معانا محشي كوسه و محشي بطاطس بالمفروم

 المقادير :

 ½ كيلو بطاطس صغيره / ½ كيلو كوسه / ربع  كيلو مفروم عصاج/ صلصه / ملح و فلفل و بهارات

 الطريقه:

1-    حنقور البطاطس و الكوسه بعد ما نقشر البطاطس .

2-    حنقلي حشو البطاطس في زيت عادي .

3-    نحتفظ بها جانبا و نصفيها من الزيت.

4-    نقلي البطاطس في نفس الزيت  و الكوسه حتي تتحمر و نصفيهم.

5-    يحضر العصاج بتدبيل البصل في قدر و وضع اللحم و الفلفل و الملح و القرفة.

6-    نحشي الكوسا و البطاطس.

7-    نضع حشو البطاطس المقلي  و نضع البطاطس و نصب عليها من اللحمة المتبقية.

8-    نضع الكوسا  في القالب أيضا و و نغطيها من اللحم المتبقي أبضا .

9-    ندخلها الفرن لمدة نصف ساعة .

10-   نقدمها مع رز بالشعرية.

 يا رب تكون عجبتكم

رقاق باللحمة المفرومة

السلام عليكم يا قمرات

 معانا رقاق باللحمة المفرومة بطريقه جديده شفتها في فتافيت

 المقادير:

 نص كيلو رقاق / ربع كيلو لحمة مفرومة / بصلتين كبار / لبن و شوربه / 1 م كبيره زبده / نص عبوة كريمة طهي و صفار بيضه / ملح و فلفل و بهارات.

 الطريقه:

 1-    حنحضر اللحمة المفرومة زي ما قلنا في طريقه المكرونة البشامل.

2-    حنجيب صينيه فرن نحط فيها اللبن و الشوربه و هما سخنين .

3-    نحضر الرقاق ونحط علي اللبن معلقه الزبده.

4-    ندهن الصينيه اللي حنحط فيها الرقاق .

5-    نبدأ نأخد حتته رقاق كبيره نحاول مش نكسرها و تحطها في اللبن و الشوربه علي الجانبين و نفرش القالب زي الجلاش .

6-    نحط نص مقدار الرقاق و نحط عليه المفروم.

7-    نكمل باقي المقدار لحد ما نخلص الرقاق.

8-    نقطع الصينيه مربعات و نكون مسخنين الفرن.

9-    نحطها في الفرن لحد ما تتنشف شويه و نطلعها نكون محضرين نص عبوة الكريمة و مضروب معاها ضفار البيض و ملح و فلفل و نحطها عليها.

10- ندخلها الفرن تاني لحد ما تتحمر و تتقدم و هيا سخنة.

 يا رب تكون عجبتكم

قالب الكفته بخلطة البيتزا

السلام عليكم يا قمرات

النهارده معانا قالب الكفته بس محشي خلطة البيتزا هو اختراعي بس بجد حلو و حيعجبكم

المقادير:

½ كيلو مفروم / بصله كبيره مبشورة ناعم / ملح و فلفل و بهارات / حشو البيتزا ( زيتون / فلفل رومي / جبنة موزاريللا / طماطم / مشروم )

الطريقه:

 1-    حنحضر الحشو نقطع الطاطم حتت صغيره و الفلفل و الزيتون و المشروم و نخلطهم سوا.

2-    حنجبشر البصله ناعم و نخلطها باللحمة مع البهارات و الملح و الفلفل.

3-    حنبطن القالب بتاع التوست بجزء من اللحمة و نفرش الخلطة .

4-    حنحط علي الوش الجبنة .

5-    نغطي القالب بباقي اللحمة و ندخلها الفرن لمده نص ساعه أو علي حسب نوع الفرن.

6-    نسيبها تهدي شويه و نقطعها زي التوست و نقدمها مع مكرونة أو رز زي ما تحبوا

 يا رب تكون عجبتكم

لحمة ستيك

السلام عليكم يا قمرات

النهارده عندنا لحمة ستيك سهله و سريعه و طعمها حلو بجد.

المقادير :

½ كيلو بفتيك / زبده / ملح / فلفل / صوص الصويا / بابريكا / قرفه / جنزبيل / ¼ كوب ماء .

الطريقه:

1-     حنخلط البهارات مع صوص الصويا و الميه .

2-    حنجيب الطاسه و نحط فيها الزبده .

3-    حنحط اللحمة لما الطاسه تسخن كويس و تأخد صدمة علي كل ناحيه .

4-    نضيف التتبيله و نسيبها علي النار و كل ما تحتاج ميه نزودها نص كوبايه.

5-    و لما تستوي نديها لون تحمير خفيف كده و نقدمها.

يا رب تكون عجبتكم

لازنيا باللحم المفروم

السلام عليكم يا قمرات

النهارده حنعمل اللازنيا حلوة و ان شاء الله تجربوها.

المقادير :

علبه لازنيا جاهزة / ¼ مفروم / 2 كوب بشامل / جبنة موزاريللا / صلصه / جزر مبشور / بصل مبشور ناعم / بهارات و ملح و فلفل

الطريقه:

1-    حنحضر اللحمة المفرومة نفرم البصله و نحطها في حله علي النار مع زيت .

2-    و نضيف ملح و فلفل و بهارات .

3-    نضيف اللحمة .

4-    نضيف الصلصه و الجزر المبشور ناعم.

5-    نحضر البشامل 

6-    نحضر اللازنيا و نتأكد اذا كانت تسلق مسبقا أم لأ.

7-    نضع طبقه بشامل و من ثم طبقة صوص من ثم طبقة لازنيا و نكرر حتي نصل أخر طبقه نضع فوقها الجبن  .

8-    نحطها في الفرن لمده نصف ساعه فرن متوسط الحرارة .

يا رب تكون عجبتكم

كفته مشوية في الفرن

السلام عليكم يا قمرات

معانا النهارده كفته مشويه في الفرن و يا سلام لو اتحط عليها حته فحمة حتكون أحلي و أحلي

المقادير :

½ كيلو لحمة مفرومة / 3 بصلات صغيرين مبشورين ناعم / ملح و فلفل و كاري و بابريكا و قرفه و جنزبيل و دبس الرمان

الطريقه:

1-     حنبشر البصل ناعم و نعصره من الميه و نحطه علي اللحمة .

2-     حنشيل الميه علي جنب .

3-    حنحط كل البهارات اللي فوق علي اللحمة و نخلطها كويس.

4-    حنجيب سيخ الشيش طاووق و نأخد شويه لحمة و نصبع بيهم السيخ و نبلل ايدينا في ميه البصل و احنا بنصبع الكفته.

5-    نرصها في الصينيه و ندخلها الفرن .

6-    نسيبها تسوي ¼ ساعه و تكون تمام.

7-    نقدمها مع مكرونة و بطاطس محمرة و سلطة طحينة.

يا رب تكون عجبتكم

محشي ورق عنب

السلام عليكم يا قمرات

النهارده معانا محشي ورق عنب 

المقادير:

ورق عنب / بصل مبشور / طماطم معصوره / حزمة بقدونس و حزمة كزبره و حزمة شبت / ملح و فلفل و كمون و نعناع ناشف / شوربه أو ( ميه فيها مدوب مكعب فاين فودز ) / زيت

الطريقه:

1-     حنحضر ورق العنب زي ما ما هو مكتوب في أ ب طبخ.

2-    حنجيب حله نحط فيها زيت و نحط البصل يدبل نحط الخضرة مفرومة ناعمة.

3-    نقلبهم شوا و نطفي النار .

4-    نضيف صلصه الطماطم و الرز.

5-    نحط الملح و الفلفل و الكمون.

6-    نجيب الورقه و نحشي زي الصورة ( نحشي علي الجزء الخشن.)

7-    نحضر الشوربه و نعصر ليمونتين علي الشوربه و نسقي بيها المحشي و نحط طبق زي الصورة علي وش الحله.

8-    لما تتشرب نشيله نوطي النار و نسيبه يستوب علي مهله.

يا رب يكون عجبكم

البصارة

السلام عليكم يا قمرات

معانا أكله مصريه جميله هيا البصاره هناك من يحضرها بااضافة الخضرة و من يحضرها باضافة الملوخية الجافة .

المقادير:

¼ كيلو فول مدشوش / حزمة و نص بقدونس / حزمة كزبره خضرا / 3 فصوص توم كبيره / بصله متوسطة

الطريقه :

1-    ننقع الفول في ماء لمدة 12 ساعة.

2-    نحضر طنجرة و نضع الفول بعد تصفيته من ماء النقع و معه البصل و الخضرة و الثوم.

3-    نضعها علي النار و نتركها بعد تغطيتها بالماء لمدة  ¼ ساعه.

4-    عندما ينضج الفول نطفي النار و نتركها تهدأ قليللا .

5-    نضع  الخليط في الخلاط و لكن بدون ميه و نبدأ في اضافة القليل من الماء حتي لا تكون خفيفة القوام.

6-    نعيدها مرة أخري في الطنجرة و نضيف الملح والفلفل و الكمون ( ممكن اضافة الشطة حسب الاختيار).

7-    نقطع بصل و نحمره في الزيت و نضعه في طبق و نتركها تبرد ونضع علي وجهها البصل و تقدم باردة مع اضافة قليل من الليمون.

يا رب تكون عجبتكم

مكرونة سي فوود

السلام عليكم يا قمرات

معانا وصفه من ناني فيبس حبيبتي من منتدي عروس\

المقادير:

1/2 كيلو جمبري على كليماري / وفصين توم كبار او 3 وسط / وملح وفلفل اسود وكمون ربع معلقة او نص معلقة صغيرة/ ومعلقة صغيرة نشا /نص كوبايه ميه/ معلقتين كبار زيت زيتون او اي زيت / تقريبا 250 مل كريمه / نص كيس مكرونه قلم / 50 جرام جبنه برميزان / رشه بقدونس او كسبرة خضرا

الطريقه:

1- -بنتبل السي فود (جمبري وكليماري) بفصين توم مهروسين مع ربع معلقة كمون ورشه ملح وفلفل اسود ومعلقة صغيرة نشا مدوبه في ربع كوبايه ميه ونسيبهم ساعه.

2- نجيب طاسه نحط فيها معلقتين كبار زيت زيتون اوي اي زيت نباتي ونشوح فيهم السي فود ونضيف ربع كوبايه ميه ونسيبهم 5 دقايق يستوا

3- نضيف الكريمة وتقريبا 250 مل ونقلب ونظبط الملح

4- نجيب جبنه برميزان ونبشر كميه كويسه على السي فود ونقلب   

5- ونكون سلقين مكرونه ونضيف عليها خليط السي فود ونزين بكسبرة خضرا او بقدونس مع بشر جبنه برميزان

يا رب تكون عجبتكم

كفته السمك

السلام عليكم يا قمرات

النهارده معانا كفته السمك حلوة و سهله و حيبوها الصغار و الكبار.

المقادير :

½ كيلو سمك فيليه أي نوع / حزمة بقدونس / فلفل رومي واحده / م ص مسترده و م ص كاتشاب و ملح و فلفل و كمون و بابريكا و توم مطحون و عصير ليمون./ دقيق

الطريقه:

1-    حنفرم السمك في الكبه و نفرم البقدونس ناعم و الفلفل الرومي حتت صغيره قوي.

2-    حنخلطهم مع التتبيله اللي في المقادير فوق.

3-    نضيف ¼ كوب دقيق.

4-    نعجنها و نعملها كور لو لقيتوها لسه ملزقه ممكن تكوروها بالدقيق .

5-    نحطها في الطاسه مع شويه زيت و نسويها مش بتأخد وقت .

6-    نقدمها مع الرز الأبيض و السلطة.

يا رب تعجبكم

سجق بالخلطة

السلام عليكم 

النهارده معانا سجق بالخلطة هو سجق اسكندراني بس طعمه جميل ...... السجق ده عباره عن ممبار الخروف و محشي لحمة مفرومة متبله.

المقادير :

¼ كيلو سجق / فلفل رومي واحدة / بصلة متوسطة / ملح و فلفل / زيت / صلصة / قليل من الماء

الطريقه:

1-     نضيف الزيت الي الطاسة ملعقة واحدة تكفي .

2-     نضيف البصلة المفرومة و ندبلها و نقطع الفلفل رومي قطع صغيرة و من  ثم نضيفها.

3-    نضيف السجق و تركه علي النار لينضج .

4-    نضيف الصلصة و قليل من الماء و نتركها تتسبك و نتأكد من الملح .

5-    نغطيها و نهدأ النار لمدة 3 أو 5 دقائق .

6-    نقدمها مع رز أو مكرونة.

يا رب تكون عجبتكم

قالب كفته بالخضار

السلام عليكم يا قمرات

النهارده معانا قالب كمفته بالخضار جديد و حلو بس اللي تعمله و يعجبها تدعي لأمي بالرحمة عشان الطبق ده من ابتكارها.

المقادير:

نص كيلو لحمة مفرومة / بصل مبشور ناعم عدد 2 / ملح و فلفل و قرفه و بابريكا و جنزبيل و كاري و كزبره ناشفه ( طبعا تحطي براحتك علي حسب حبك للبهارات دي ) / خضار سوتيه ( جزر /بطاطس / فاصوليا / بسله ) ¼ كوب من كل صنف.

الطريقه:

1-     حنتبل الللحمة بالبهارات و البصل و نعجنها كويس.

2-     نسلق الخضار و نسويه زي السوتيه بملح و فلفل أسمر.

3-  نجيب قالب الباوند كيك و نبطن بيه جزء من الكفته .

4-    نحط الخضار جوه القالب و لو فيه جبنه شيدر أو موزاريللا ممكن نحط .

5-    نجيب باقي الكفته و نقفل بيها القالب.

6-    نسوي وش القالب و نحطه في الفرن لمده ½ ساعه .

7-    نستني لما يبرد شويه و تقطعه و نقدمه مع رز أبيض أو مكرونة

يا رب تكون عجبتكم