بسيمة بالموز

السلام عليكم يا قمرات

النهارده معانا بسيمة بالموز ............... هيا عندي في الكتاب بسيمة بس الموز ده اختراعي هههههههههه

المقادير:

كوب دقيق سميد / كوب دقيق / كوب جوز هند / كوبايه الا ربع سكر / ½ كوبايه زيت / 1 م ك بيكنج بودر / كوبايه و نص لبن ( حليب )/ موزة

الطريقه:

1-    حنخلط المقادير الجافه سوا .

2-    حنضيف الزيت و الحليب.

3-    حنهرس موزة و نضيفها .

4-    نقلب المكونات كويس بالمضرب اليدوي.

5-    نصبها في قالب بايركس أو صينيه مدهونة .

6-    نسخن الفرن و نحطها حوالي 30 دقيقه أو ممكن زياده.

يا رب تكون عجبتكم

الدونتس

السلام عليكم يا قمرات

النهارده معنا دونتس سهله و سريعه بطريقه منال العالم أنا جربتها كتير بجد حلوة و مش بتأخد وقت

المقادير:

2 كوب دقيق / بيضه / نص ك سكر / نص م كبيره بيكنج بودر / فانيليا / ¾ م ص ملح / لبن للعجن / ¼ ك زبده./ زعفران ( حسب الرغبه )

الطريقه :

1-     حتخلطي المكونات الجافه كلها .

2-     تضيفي البيضه و الزبده (أنا سيحتها بعد ما عايرتها )

3-    تضيفي اللبن شويه شويه و تعجني.

4-    تسيبيها ترتاح 1/2 ساعه في التلاجة.

5-    نفردها علي شويه دقيق و نبدأ نقطعها.

6-    نسخن الزيت و نبدأ نقليها مش بتأخد وقت علي كل وش دقيقه يعني.

7-    نزينها بالمتوفر . ( شيكولاته سايحة أو سكر بودره أو صوص فراوله أو شيكولاته و سوداني أو شيكولاته و فارمسيل )

 (أخر صورة دي كنت عملت الدونتس برضه و نزلتها في منتدي عروس)

 يا رب تكون عجبتكم

تشيزكيك

السلام عليكم يا قمرات

معانا النهارده تشيز كيك بس بالكيك مش بالبسكويت سهله و مش مكلفه.

المقادير:

¼ كيلو جبنه بالقشطة /علبه قشطة  / سكر / كريم شانتيه بودر/ ½ كوب لبن ( حليب ) بارد / شرايح خوخ كمبوت أو أي فاكهة / كيكه اسفنجيه رفيعه.

مقادير الكيكه:

2 بيضه / 1/3 ك سكر / ½ ك دقسق / ½ م ص بيكنج بودر / فانيليا .

الطريقه :

1-     حنعمل كيكه بنفس طريقه الكيكه الأسفنجيه ( موجوده في وصفه تورته عيد ميلادي )

2-     نسيبها تتبرد.

3-     نخلط القشطة و الجبنة و لو كريم شانتيه بالكيلو حتحطي 16 م ص لو أكياس حتحطي كيس و نص و سكر حسب الرغبه يعني .

4-     نضيف اللبن و نضربهم بالمضرب لمده 5 دقائق.

5-     نضيف نص الخليط فوق الكيكه و نرص شرايح الخوخ و بعد كده نضيف باقي الخليط.

6-     نسوي الوش عشان يكون زي بعض و نحطها في التلاجة تسقع لمده مش أقل من 5 ساعات .

7-    نزوق الوش بالكاكو أو التوبنج اللي يريحك.

يا رب تكون عجبتكم

كيكه الشيكولاته بدون بيض

السلام عليكم يا قمرات

معانا كيك الشيكولاته بدون بيض عشان خاطر حبيبتي سالاد من عروس مش بتحب البيض ....عملتها امبارح عشان فعلا مكنشي عندي بيض و عجبت صاحب جوزي جدا و مكنشي مصدق انها بدون بيض ههههههههه

المقادير:

1 و ½ ك دقيق / 3 م كاكاو / 1 ك سكر / ½ ك زيت / 1 ك ماء / 1 م ص خل / فانيليا / 1 م ص بيكنج بودر

الطريقه:

1-    حتخلطي المكونات الجافه سوا .

2-    تضيفي الميه و الخل و الزيت.

3-    تضربيهم بالمضرب  شويه .

4-    تصبيهم في قالب و تخبزيه في الفرن لمده 30 ساعه أو برضه حسب فرنك.

5-    ممكن تضيفي علي الكيكه سوداني مجروش أو حتت شيكولاته و تزوقي حسب الرغبه أنا حطيت صوص كرامل و سوداني و عملت للألاد بشيكولاته نوتيلا.

يا رب تكون عجبتكم

تورته عيد ميلاد 

السلام عليكم 

المقادير:

7 بيض / 2 ك دقيق/ 1و ½ سكر / باكو بيكنج بودر /فانيليا

الطريقه :

1-     ضربت البيض و السكر سوا مع الفانليا لمده 10 دقايق متواصل و لحد ما بقت كده . تنخلي الدقيق و البيكنج بودر و نضيفهم شويه شويه و نقلب بخفه من تحت لفوق عشان مش تهبط و لحد ما يخلص الدقيق.

2-     حطيت ورقه زبده في قالب مستطيل زي ده .

3-     حطيت القالب في الفرن استوي في 30 دقيقه عشان فرني عالي .و لو فرنك حامي حطي صاجة تحت الشبكة .

4-     صفيت الكمبوت من الميه عشان لما ازوق بيه يكون ناشف صفيته في مصفاه يعني.

5-     سيبتها ترتاح لحد بالليل .

6-     قسمتها 3 طبقات و سقيتها بالفرشاه بميه الكمبوت.

7-     عملت كريمة و حطيتها في كيس حلواني و مشيت علي اول طبقه لحد ما بقيت كلها كريمة قمت فردتها بالسكينه المسطحة و حطيت حتت الكبموت .

8-     عملت 3 طبقات نفس النظام و لما خلصت فردت كريمة علي الوش و الجوانب و حطيتها في التلاجة لتاني يوم.

9-     الصبح ضربت كريمه تانيه و أضفت عليها جيلي فراوله و جزء عليه كاكاو و جزء عليه جيلي مانجا و سيبتها فتره عشان حبوب الجلي السكريه دي تدوب.

10-   قطعت الكنتالوب و الخوخ و عملت حرف زد و رصيتهم.

11-   و زوقت بباقي الكريمه الفراغات.

12-  حطيت علي الجوانب جوز هند و سوداني مطحون .

13-     الحمد لله عجبتهم جدا و جوزي كان معجب بيها قوي و كلفتني 15 جنيه بس وعقبال تورته بودي ان شاء الله الشهر اللي جاي.

سويسرول بالكريمة و المربي

السلام عليكم يا قمرات

معانا النهارده حاجة حلوة و مش مكلفه و طعمها وااو جميل جدا

المقادير :

4 بيض / ¾ كوبايه سكر / ¾ كوبايه دقيق / فانيليا / م ص بيكنج بودر

الطريقه:

1-     حنضرب البيض مع السكر و الفانيليا 10 دقايق متواصل.

2-     حنضيف الدقيق و البيكنج بودر علي مراحل و نقلب بالراحة من تحت لفوق و لما يختفي أول مقدار نضيف التاني لحد ما يخلص الدقيق .

3-     حنجيب صينيه مستطيله و نبطنها بورق الزبده.

4-     نصب الخليط عليها و نخبزها في فرن متوسط لمده 10 / 15 دقيقه ( خدي بالك الوش حيكون طري مش ناشف

5-     نطلعها و نشيلها بورق الزبده و نجيب ورقه زبده تاني علي نفس حجمها و نحطها عليها و نقلبها .

6-    دلوقتي بقه القعر فوق نشيل ورقه الزبده اللي كنا بطنا بيها الصينيه من علي الكيك.

7-    ندهنها مربي أو كريمه ( اللي تحبيه )

8-    نمسك ورقه الزبده و نتني طرف الكيكه لجوه زي الأسطوانه.

9-    نمسك ورقه الزبده و نسيب الكيكه تلف رول للأخر.

10-   نضم عليها الورقه بعد ما بقت اسطوانه و نجيب حاجة طويله علي طول السويسرول ونزنق بيها الرول عشان يبقي ملفوف كويس.

11-   نزوقها بأي حاجة متوفرة عندنا و ان شاء الله حنزلكم فيديو فيه طريقه اللف المظبوط.

يا رب تعجبكم

براونيز

السلام عليكم يا قمرات

أنا دورت علي طرق كتيرة للبراونيز و أكتر طريقه عجبتني هيا دي .

المقادير :

¾ كوبايه دقيق / ½ كوبايه كاكاو و م كبيره / ¼ م ص ملح / ½ كوبايه زبده / 1 كوبايه سكر / 3 بيضات / فانليا / 2 م ك لبن ( حليب )

شيكولاته قطع و سوداني مجروش أو بندق

الطريقه:

1-    حنضيف السكر و الزبده و نضربهم لحد ما الخليط يبقي كده.

2-    حنضيف البيض و الفانيليا و نضربهم سوا.

3-    حنضيف الدقيق شويه و كاكاو شويه لحد ما المقدار يخلص.

4-    حنضيف الحليب.

5-    حنضيف المكسرات و الشيكولاته و نقلب ...... خدي بالك الخليط حيكون أتقل شويه من الكيكه العاديه.

6-    حنحطه في صينينه و حيكون مش سميك زي كده.

7-    نسويه في فرن متوسط لمده 25 / 30 دقيقه أنا استوي عندي في 25 دقيقه .

8-    نستني لما يدفا و نقدمه مع أيس كريم ( أنا بجيب فايف مينتس أيسكريم بودر و أعمله ) و التزيين اللي يعجبك.

يا رب يكون عجبكم

بانكيك

السلام عليكم يا قمرات

عملت بانكيك أول امبارح فطار بس كان جميل جدا و حشيته من اللي متوفر في البيت كاستر و سوداني مجروش

المقادير :

كوبايه و نص دقيق / كوبايه و نص لبن / 2 بيضه / 1 و نص بيكنج بودر / فانيليا / 3 ملاعق كبيره زبده سايحة/ 2 م كبيره سكر

الطريقه :

1-     حنخلط البيض و الزبده مع اللبن و الفانيليا .

2-     حنضيف الحاجات دي علي الدقيق و البيكنج بودر و الفانيلا.

3-     نضربهم كويس ( أنا ضربتهم بالمضرب الأفقي براون )

4-     نجيب طاسه ندهنها بحته زبده و نمسحها بمنديل.

5-     نحط مقدار من العجينه حيعمل قرص حلو زي الصورة .

6-     حنحط أول قرص و ندهنه كاستر و نرش سوداني .

7-     نعمل 3 أقراص تانيه و بعد كده تسقيها برحتك شيكولاته أو أيس كريم أو صوص فراوله أو سكر بودرة .

8-     نقدمها و تتأكل دافيه .

يا رب تكون عجبتكم

سينابون

السلام عليكم يا قمرات

النهارده وصفه جامده موووووووووت و حتعجبكم و حتوفر تمن السينابون اللي بنجيبه من بره بالشيئ الفلاني طبعا فاهمني هههههه

المقادير:

550 جرام دقيق / 80 جرام زبده أو ¾ كوبايه زبده بتاعه الجبنه عارفينها / 2 م ك خميرة / نص كوبايه سكر او 75 جرام سكر / 2 بيضه / 210 مللي لبن دافي / رشه ملح

الطريقه:

1-      حتحطي كل المكونات علي بعض و تعجينيها كويس ممكن تحتاجي دقيق تلمي بيه العجينة .

2-      تحطيها في السلطانيه اللي حتتخمر فيها.

3-      تحطي عليها كيس نايلون و بعدين فوطة و تحطيها في فرن دافي ( ماما الله يرحمها علمتني كده ) بعد كده شوفت حوريه بتعملها.

4-      تسيبيها تخمر ساعه تكوني حضرتي الحشو اللي هو م ك قرفه / نص كوبايه سكر / نص ك زبده ( نفس معيار الكوبايه اللي فوق )

5-      تفردي العجينة زي الصور كده.

6-      شوفي طريقه التقطيع بالخيط جميله بصراحه.

7-      تخبزيها في الفرن متوسط لحد ما تستوي من تحت و ممكن تديها وش شوايه لو محتاجة من فوق بس تابعيها.

8-      تصبي عليها صوص شيكولاته يا قمر و تتأكل دافيه .

يا رب تكون عجبتكم

فطيره الليمون

السلام عليكم يا قمرات

النهارده وصفتنا حلوة كنت شفتها في فتافيت و عجبتني فعملتها و طلعت حلوة قوي

المقادير:

4 بيضات / علبه لبن مكثف كبيره / ليمونتين / بسكويت دايجستف ( أو أي بسكويت ساده ) / 5 م ك سكر بودرة / رشه ملح

الطريقه :

1-       نضرب نص عبوة البسكويت اللي في الصورة في الكبه نكسره يعني و نضيف عليه 3 م ك زبده و نضربه تاني.

2-       نبطن بيه قالب البايركس و نحطه في الفرن تقريبا 15 دقيقه أو لحد ما يتحمر وشه شويه.

3-      نفصل الصفار عن البياض.

4-      نضيف علي الصفار علبه اللبن المكثف.

5-      نضيف بشر الليمونتين و عصيرهم.

6-      نضرب بالمضرب و نصب الخلطة علي البسكويت بعد ماكان برد شويه.

7-      نحطها في فرن متوسط لمده ساعه تقريبا بسي شوفيها برضه لحد ما يجمد و يستوي و يأخد لون كده.

8-      نغسل المضرب و الطاسه اللي حنضرب فيهم البياض و نشفهم كويس جدا.

9-      نضيف البياض و رشه الملح و سكر البودرة و نفضل نضربه لحد ما يتماسك و يبقي زي الكريمة.

10-  نسيب القالب يبرد شويه و نحط علي وشه المارينج اللي هو البياض.

11-  نحطه في الفرن تحت الشوايه بس في أخر رف تحت و نوطي الشوايه علي قد ما نقدر و نتابعه لحد ما يأخد لوون بلييز مش تنسووووه عشان ممكن يتحرق و كمان مش يكون الفرن حامي قوي.

12-  نسيبها تبرد و نحطها في التلاجة و نأكلها تاني يوم رهييييييبه بجد.

يا رب تعجبكم

تريفل بفاكهة الصيف

السلام عليكم يا قمرات

النهارده معانا وصفه خفيفه و مش مكلفه عشان احنا عارفين الميزانيه و ما أدراكم ما الميزانيه المهم

المقادير :

قالب سوسرول / كوبايه كريم شانتيه / أي نوع فاكهة ( فراوله / موز / خوخ ) اللي تحبيه / أي حاجة تزيني بيها ( شيكولاته فارمسيل / كاكاو )

الطريقه :

1-       نبطن قالب بايركس بورق اللي بنغطي بيه الحاجات في التلاجة

2-       نرص شرايح السوسرول داير القالب نبطنه يعني

3-       نخلط جزء من الكريمة مع أي نوع فاكهة زي ما قلنا و نحط فوق السوسرول

4-       نعمل طبفه سوسورول تانيه

5-       و نعمل طبقه فكهة تانيه

6-       و نقفل القالب بطبقه أخيرة من السوسرول

7-       و نغطيه و نسيبه يجمد

8-       نقلب القالب علي سرفيس و نشيل الورق و نزينه باللي عندنا زي ما قلنا أنا حطيت فارمسيل ألوان

9-       و أهو شكله من جوه جميل و منعش في حر الصيف و كمان مش مكلف

10-   يا رب يكون عجبكم

تورتة عيد ميلادي

ازيكم يا قمرات

دي طريقه كيكه عيد ميلادي معلش اتأخرت عليكم شويه

المقادير:

  5 بيض / كوبايه و ربع دقيق / 1 م ص بيكنج بودر / فانيليا / كوبايه الا ربع سكر

الطريقه:

1-       ان شاء الله حأنزلها بالتفصيل بس دلوقتي نقولها حتضربي البيض و السكر متواصل لمده مش تقل عن 10 دقايق و فانليا طبعا.

2-       حتنخلي الدقيق و البيكنج بودر مرتين .

3-       حتضيفي الدقيق شويه شويه و كل ما تحطي شويه تقلبي بالمعلقه البلاستيك بخفه من تحت لفوق و اما تتأكدي انه الدقيق كله اختفي حتحطي تاني و هكذا لحد ما يخلص الدقيق.

4-       تكوني مسخنة الفرن تحطي الصينيه و مش تخلي النار عاليه و لا تقفلي الفرن بسرعه و لو فرنك بيحرق الحاجة حطي تحت الصينييه علي شبكة تانيه صينيه فيها شويه ميه .

5-       لو فرنك زي كريازي و مش عندك غير شبكة واحده هاتي الصاجة اللي بتتحط تحت الشبكة دي و حطي عليها الميه.

6-       مش تفتحي الفرن الا بعد 20 دقيقه زي ما انتوا عارفين و في فرن بيسويها في نص ساعه و في فرن بيأخد 45 دقيقه.

7-       لما تستوي اطفي الفرن و واربي الباب بتاعه و سيبيها 5 دقايق كده عشان لو طلعتي بيها علي طول ممكن تهبط.

8-       سيبيها ترتاح شويه.

9-       أنا بقه عملت الأتي :

   أولا أنا مش جبت أي حاجة من بره عشان مكنشي فيه فرصه أنزل أساسا خبزت الكيكه و طلعت الحاجات اللي في درج الحلويات عندي هههههههه لقيت جوز هند و سوداني مفروم و أيس كريم مانجا و أيس كريم شيكولاته و شويه كريم شانتيه يعملوا كوبايه و شيكولاته خام أنا بجيب كورونا روووووووعه.

ان شاء الله تكون عجبتكم