تورته الخوخ

السلام عليكم يا قمرات

معانا تورته الخوخ سهله و سريعه و بسيطة

المقادير:

3 بيض / نص كوب سكر / 1 علبه زبادي ( 125 جرام ) / كوب دقيق / بيكنج بودر و فانيليا / 2 م ك زبده / كريم شانتيه / كمبوت خوخ

الطريقه:

1-     نضرب السكر و البيض و الفانليا كويس.

2-     نضيف الزبده .

3-     نضيف الزبادي و نخلط.

4-     ننخل الدقيق مع البيكنج بودر و نضيفها للخليط.

5-     لو لاحظنا انه تقيل ممكن نزوده من ميه الكمبوت بس يا ريت نأخد بالنا مش كتير لحد القوام المناسب.

6-     نحضر صنيتين صغرين أو صينيه مناسبه و ندهنها و نعفرها بالدقيق .

7-     نصب الخليط و نخبزه في فرن متوسط.

8-     نسيبها تبرد و نحضر الكريم شانتيه و نزوق زي الصزرة.

9-     نحط الكيكه التانيه فوق و نزوق زي الصورة.

10-     نسيبها نبرد شويه و نقدمها.

يا رب تكون عجبتكم

البسبوسه

السلام عليكم يا قمرات

معانا البسبوسه أخدت الطريقه من أم مازن حبيبتي من منتدي عروس و عملتها و طلعت حلوة جدا

المقادير:

2 كوب سميد ناعم / كوب سكر / كوب لبن / 4 ملاعق كبار زبده أو كوب الا ربع سمنة ( أنا استخدمت زبده ) / ¼ م بيكنج بودر

السيرب خفيف جدا : كوب و نص ماء / كوب و ¾ سكر / فانيليا و نقطتين ليمون

الطريقه :

1-     حنحط الزبده و اللبن و السكر علي النار لحد ما يغلو.

2-    حنضيف السميد و البيكنج بودر و نقلب كويس .

3-    نكون محضرين الصينيه و دهنينها أنا استخدمت بايركس و مش بيحتاج يدهن.

4-    ندخلها فرن متوسط الحراره لمده 20 دقيقه.

5-    في أثناء كده نحضر السيرب كله في حله علي النار و نسيبه يغلي غلوتين و نطفي عليه.

6-    تكون البسبوسه اتحمر وشها نطلعهها و نصب عليها السيرب و هو سخن .

7-    حنلاقي البسبوسه عامت مش مشكله ندخلها الفرن و هو مطفي لمده 10 دقايق تاني.

8-    بعد كده حنلاقيها شربت السيرب كله و تأكلوا أحلي بسبوسه.

يا رب تكون عجبتكم

تارت الشيكولاته

السلام عليكم يا قمرات

تارت الشيكولاته بطريقه منال العالم سهل و مش مكلف

المقادير :

عبوة بسكويت دايجستف كبيره / علبه قشطة أو قيمر / شيكولاته مبشوره / 2 بيض / زبده / ماء / كريمه باتسيير للوجه

الطريقه:

1-     نكسر البسكويت و نفرمه في الكبه و نضع عليه الزبده حوالي 5 ملاعق كبيره .

2-    اذا وجدنا البسكويت غير متماسك ممكن اضافه 2 ملعقه ماء كبيره عليه و خلطه و فرده في قالب التارت.

3-    نسخن علبه القشطة في حله علي النار و عندما تسخن نضيف الشيكولاته عليها.

4-    نضيف البيض علي الخليط و نقلبه كويس

5-    نصب الخليط فوق البسكويت.

6-    نخبز الصينيه في فرن متوسط و مش عالي لمد ه 20 دقيقه.

7-    نتركها تبرد و نحضر الكريمه اللي فوق بتحضير كيس الكريمة الباتسير و وضع شيكولاته مبشوره عليه و نصبه فوق التارت .

8-    نستعمل كرمل أو شيكولا بيضا للتزيين ( ممكن تزيين التارت بأي أنواع الجناش المختلفه)

تبرد و تقدم يا رب تعجبكم

بيتزا حلوة

السلام عليكم يا قمرات

معانا النهارده اختراعي البيتزا الحلوة

المقادير :

جزء من عجينة السينابون / أي فاكهة تحبيها هنا استخدمت كيوي و موز / مارشميللو / شيكولاته / صوص شكولاته / كريمة الفراوله.

الطريقه :

1-     نحضر العجينة زي ما هيا في وصفه السينابون ( نص المقادير )

2-     نفردها في صينيه البيتزا و نخرمها بالشوكة.

3-     نخبزها في الفرن .

4-     نسيبيها تبرد و نحضر الكريمة.

5-    نزوق البيتزا بالكريمة زي الصورة .

6-    و نرص عليها الكيوي و الموز و الشيكولاته و المارشميللو.

7-    نصب صوص الشيكولاته زي في الصورة .

8-    نخليها تبرد في التلاجة و نقدمها.

يا رب تكون عجبتكم

بودنج الخبز

السلام عليكم يا قمرات

معانا النهارده بودنج الخبز حلو انجليزي و سهل جدا و بيدفي في الشتا

المقادير :

عيش فينو او كرواسون بس يكون بايت / كيس بودنج / زبيب / لبن / سكر

الطريقه:

1-     نقطع الخبز مكعبات .

2-     نرص في الفالب و نرش عليه زبيب .

3-     نحضر البودنج زي ما مكتوب علي الكيس.

4-     نصب البودنج علي العيش و هو سخن.

5-     ندخله الفرن و يكون الفرن متوسط الحراره لمده 20 دقيه. ( بس نأخد بالنا مش يتحرق )

6-     يتقدم و يزين بصوص الشيكولاته و هو سخن ... أنا استخدمت بودنج الموز عشان كده زينت الطبق بالموز.

يا رب يكون عجبكم

تورتة عيد ميلاد 5

السلام عليكم يا قمرات

النهارده معانا تورته جديده و سهله و بسيطة

المقادير :

زي ما قلنا الكيكه ليها 7 بيضات / كوب و نص دقيق / كوب و ربع سكر / فانيلا / 1 م بيكنج بودر و طريقتها زي ما هي موجوده في الموقع .

الحشو كريم شانتيه و فراوله و موز

التغطيه كيوي و أناناس و بيريه الفراوله و كريمة و الجناب سوداني.

الطريقه:

1-     حنعمل الكيكه زي ما متوضحة في التورت اللي قبل كده.

2-     نسيبها تبرد خالص و يستحسن نعملها من بالليل و ندخلها التلاجة .

3-    نحضر الكريمة. و نقسمها 3 أقسام.

4-    او جزء نحشيه كريمة و شرايح الموز.

5-    تاني طبقه كريمة و شرايح الفراوله.

6-    نغطي الوش بالكريمة و الجناب بالسوداني .

7-    نعمل بالطبق صغير دايرة جو التورته عشان نزينها بالوردات و نصب فيها بيريه الفراوله.

8-    نرص شرايح الكيوي و الأناناس زي ما متوضح.

9-    نحضر الفراوله أنا استخدمت فراوله متخزنة عندي حطيتها علي النار مع سكر و شويه ميه لحد ما اتركزت هرستها شويه و حطيت منها لما بردت في الدايرة اللي في النص.

ان شاء الله تكون عجبتكم

   ساندويتشات الكوكيز بالشوكليت

السلام عليكم يا قمرات

النهارده معانا وصفه أخدتها من عروس من أخت princess pearl و عجبت الأولاد جدا و سهله و بسيطة.

المقادير:

3 و نص كوب دقيق / م ص ملح / 1 كوب و نص كاكاو بودره / 1 م بيكنج بودر صغيره / 8 م زبده لينة / 2 كوب سكر / 2 بيضه / 2 كوب لبن / فانيليا

الكريمة :

½ كيلو جبنة كريمة ( جبنة بالقشطة ) / 5 م زبده / 2 و نص كوب سكر بودره / فانيليا و ألوان طعام حسب الرغبه

الطريقه :

1-     حنضرب السكر مع الزبده لحد ما لونها يبيض و القوام يكون هش.

2-     حنضيف البيض و الفانليا .

3-     ننخل الدقيق مع الكاكاو و البيكنج بودر .

4-     نضيف الدقيق علي الخليط بالتناوب مع اللبن لحد ما نوضل للقوام ده .

5-     حنأخد بمعلقه الأيس كريم بوله صغيره و نبدأ نرص في الصينيه بس خدوا بالكم يكونوا بعاد عن بعد .

6-    ندخلهم الفرن ما بين 10 الي 15 دقيقه متوسط الحراره المهم انه يكون استوي من تحت لو كان لسه طري من فوق من مشكله حيكمل سواه بره.

7-    نحضر الكريمة نضيف الزبده و الكريم تشيز و السكر و الفانيليا و لون الأكل أنا استخدمته وردي و حطيت منكه برضه بطعم الفراوله.

8-    لما الكوكيز يبرد خالص ندهن الكوكيز بطبقه من الكريمة و نلزقهم و نقدمهم .

9-    أنا عملت نص المقدار و الباقي من الكريمة عملت بيه كيكه .( أخر صورة )

يا رب تكون عجبتكم

الأكلير

السلام عليكم يا قمرات

النهارده معانا الأكلير سهل و طعمه جميل جدا

المقادير :

كوب دقيق (  معيار كوبايه الجبنة لا فاش كيري )/ 250 مللي ميه / 3 بيضات كبيره أو 4 صغيره / 2 م كبيره زبده / فانيليا / كريم باتسير / شيكولاته لتزيين الوش

الطريقه:

1-     حنحط الميه و الزبده علي النار .

2-     أول ما تغلي الميه و الزبده تسيح نسيلها و نضيف الدقيق و نقلب كويس لحد الدقيق كله يدوب .

3-     نسيبها شويه تهدي و نبدأ نضيف البيض واحده و نضربها كويس و نضيف التانيه و هكذا.

4-    حنحط الخليط في كيس حلواني و نعمل بيها شكل الأكلير.

5-    حنخبزها في الفرن لمده ½ ساعه في الفرن المتوسط الحراره و نتركها شويه في الفرن و هو مطفي .

6-    نحضر كريم باتسيير.

7-    نحشي الأكلير.

8-    نحضر الشيكولاته و نسيحها في حمام ميه و نضيف 2 م كبيره من كريم باتسير علي الشيكولاته.

9-    و نغطي بيه الوجه و تبرد.

يا رب تكون عجبتكم

تورته جديده

السلام عليكم يا قمرات

النهارده جايبلكم تورته عملتها بمناسبه عيد ميلاد مرات أخويا ان شاء الله تعجبكم

المقادير:

7 بيضات / 1 و نص كوب دقيق / 1 و نص كوب سكر / فانيليا / بيكنج بودر ( م ص )

الطريقه:

1-     حنضرب البيض و السكر و الفانيليا 10 دقايق .

2-     ننخل الدقيق مع البيكنج بودر .

3-    نضيف الدقيق علي مراحلو نقلب كويس في اتجاه واحد بخفه.

4-    ندهن الصينيه لو محتاجه مقاس 24 أو 26 لو عايزاها أكبر بس مش عاليه زي 24.

5-    نسخن الفرن وحصها لمده 35 الي 45 دقيقه حسب سخونيه الفرن.

طريقه التزيين :

1-    قسمتها 3 طبقات و حطيت علي أول طبقه عصير كمبوت خوخ.

2-    كريهم شيكولاته و كرز .

3-    تاني طبقه عصير برضه و كريمه بيضا و شرايح كمبوت خوخ.

4-    غلفت الوش بالكريمة و بعد كده حطيت بسكويت بوريو و شيكولاته فارمسيل.

5-    زينت الوش زي ما هو في الصورة.

يا رب تكون عجبتكم .

كيكه التمر

السلام عليكم

النهارده معانا كيك التمر هش و مفيد جدا 

 المقادير:

 ½ كوب  سكر بودرة / ( كوبايه ميه + كوبايه تمر ) / كوب دقيق / ¼ كوب زيت / 2 بيضه / فانيليا / 1 م كبيره بيكنج بودر / رشه ملح ( أنا عامله هنا مقدار و نص )

الطريقه:

 1-  نضع كوب التمر في الماء و نتركه علي النار حتي يغلي قليلا ثم نطفئ النار .

2-  في وعاء نخلط البيض و الفانيلا و السكر . 

3-  نضيف الزيت و نضيف التمر و الماء و يفضل أن يكون دافئ .

4-  ننخل الدقيق و  بيكنج بودر سويا و نضيفهم بالتدريج و نقلب جيدا.

5-  نحضرصينية الخبز و نبطها بمادة دهنية و دقيق جيدا .

6- نضعها في الفرن لمده نصف ساعة و نتابعها بعد ذلك.

تورته عيد ميلاد جوزي

السلام عليكم يا قمرات

دي تورته عيد ميلاد جوزي مش متصورة بالتفصيل بس هيا فيها الفكرة انها محشيه جلي و كريمة و أناناس كمبوت

الطريقه :

1-    حنحضر الكيكه الأسفنجيه و نخبزها ( للأسف هيا مش عليت بسبب البيكنج بودر )

2-    حنحضر كيس الجلي زي ما مكتوب عليه و نقطع فيه حتت أناناس كمبوت و نجمده في التلاجة.

3-    حنحضر الكريم شانتيه و يكون الجلي جمد حنخلط 2 م كبيره كريمة مع الجلي.

4-    حنقسم الكيكه و نكون ساقيناها من عصير الكمبوت.

5-    حنحط الجلي و نحط نص الكيكه التاني.

6-    حنغلف الوش بالكريمة .

7-    زينت الجناب بجوز هند و شيكولاته مبشوره.

8-    الكريمة البامبي دي عباره عن كيس أيس كريم بودرة معاه 1 كبيره بودرة كريم شانتيه و كوبايه لبن ضربتها كويس عشان تتقل كده و سيبتها في التلاجه.

9-    زينت بكيس حلواني و رصيت شرايح الكمبوت.

يا رب تكون عجبتكم

البروفيترول

السلام عليكم يا قمرات

النهارده معنا بروفيترول بالكريمة حلو و خفيف.

المقادير :

1 و ربع كوب دقيق / 100 جرام زبده / 250 مللي ميه / فانيلا / 3 بيضات / كريم شانتيه / صوص شيكولاته

الطريقه:

1-    حنحط الميه و الزبده علي النار و أول ما الميه تغلي نطفي النار.

2-    نضيف الدقيق و نقلب لحد ما العجينة تحسي انها بتبعد عن أطراف الحله.

3-    حنسيبها تهدي شويه .

4-    نضيف البيض واحده واحده و نضربها بالمضرب و لحد ما تختلط بالعجينة.

5-    نجيب صينيه خبز و نبطنها بورق زبده.

6-    بكيس الحلواني نحط وردات صغيره من الشو.

7-    نخبزها لمده 20 دقيقه في فرن متوسط الحرارة و نسيبها 10 دقايق بعد ما نطفي الفرن.

8-    نحضر كريم شانتيه و نحشي بيه البروفيترول.

9-    نحطها في طبق و نصب عليها صوص الشيكولاته

يا رب تعجبكم

كيكه الأيس كريم

السلام عليكم يا قمرات

النهارده معنا كيكه الأيس كريم حتعجبكم قوي ان شاء الله

المقادير :

كيك اسفنجي أو بالزبده بطعم الشيكولاته / باكو أيس كريم فانيليا / باكو أيس كريم كراميل/ 1 باكو بسكويت بوريو

الطريقه:

1-     حنفتت الكيك و نبطن بيه قالب الكيك اللي بيتفتح و نشيل نص الكميه .

2-    حنعمل الأيس كريم بالكرامل زي ما هو علي العلبه .

3-    حنطبه علي الكيك و نحطه في الفريزر يجمد .

4-    نعمل طبقه تانيه من الكيك المفتفت فوق الأيس كريم.

5-    نعمل ايس كريم الفانيليا و نكسر فيه باكو البوريو.

6-    نصبه علي الخليط و نحطه في الفريزر يجمد.

7-    نحضر صوص الشيكولاته ( زبده و كاكاو و سكر ) علي النار و بعد كده ننزل باللبن لحد ما نوصل للسمك اللي عايزينه .

8-    نقدمها و نصب عليها من الصوص.

يا رب تكون عجبتكم

كيكه الأناناس

السلام عليكم يا قمرات

معانا كيكه الأناناس حلوة و مش مكلفه و عملتها بناء علي رغبه أخوي الدكتور محمد  

المقادير:

4 بيضات / 2 كوب دقيق / 1/3 كوب سمنة أو زبده / فانيليا / باكو بيكنج بودر / 1 كوب سكر / ½ كوب لبن

½ كوب سكر + 2 م ماء للكراميل و علبه أناناس شرايح

الطريقه:

1-     حندوب السكر مع الميه علي النار و نسيبه لحد ما يأخد لون الكرميل .

2-نطفي النار و  نرص شرايح الأناناس في الصينيه.

3-    نضرب السكر مع السمنة لحد ما يعملوا لون أبيض.

4-    نضيف البيض و الفانيليا .

5-    ننخل الدقيق مع البيكنج بودر و نضيفهم.

6-    نضيف ½ كوب لبن و نخلط كويس.

7-    نصبها علي الأناناس و ندخلها الفرن لمده 40 دقيقه.

8-    نسقيها بشراب الأناناس اللي كان في العلبه.

9-    نقلبها بعد ما تهدي حرارتها و نقدمها.

يا رب تكون عجبتكم

بلح الشام

السلام عليكم يا قمرات

معانا نوع حلو و هو بلح الشام

المقادير :

كوبايه و ربع ميه / كوبايه دقيق / 2 بيضه / ¼ ك زبده أو زيت / فانيليا / شربات و زيت للقلي

الطريقه :

1-    حنغلي الميه و الزبده أو الزيت .

2-    اول ما تغلي نشيل الحله و نضيف الدقيق و تقلب كويس لحد ما كل الدقيق يبعد عن الحله.

3-    نسيبيها ¼ ساعه ترتاح و بعد كده نضيف البيض و الفانيليا واحده واحده و نتأكد ان البيضه خلاص اتقلبت كويس . ( ممكن نستخدم المضرب الكهربائي )

4-    نجيب كيس حلواني و نحط فيه الخليط.

5-    في أثناء كده نكون محضرين الشربات اللي هو القطر أو الشيره بس يكون مش خفيف .

6-    نحضر الزيت و نتأكد انه سخن كويس نبدأ ننزل من البلبله في الزيت و نقطع الواحده بسكينة فيها زيت .( يعني نحط طرف السكينة في الزيت و تقطع بيها بلح الشام و هو نازل )

7-    لحد ما تخلص الكميه و تكون بردت شويه نضيف عليها الشربات و نطلعها نقدمها في طبق .

يا رب تكون عجبتكم

تورته موس الفراوله ( عيد ميلاد بودي )

السلام عليكم يا قمرات

أنا قلت أعمل تجديد عن كل مرة في التورت فعملت تورته محشيه موس الفراوله بس طلعت جميييييييله بجد

المقادير :

كيكه اسفنجيه / 400 جرام فراوله / كيس أيس كريم فراوله بودر / جيلاتين مدوب في شويه ميه سخنة مش كتيرة / ¼ كوب لبن بارد / كريم شانتيه.

صوص الشيكولاته : ¼ كوب سكر / ¼ كوب كاكاو خام / لبن / 2 م ك زبده

الطريقه:

1-    أنا عملت الكيكه الأسفنجيه كنت نزلتها قبل كده و سيبتها تلرتاح.

2-    حطيت الفراوله علي اللبن و ميه الجيلاتين و كيس أيس كريم الفراوله و نضربههم في الخلاط.

3-    نقطع الكيكه بالنص و نحط نص في قالب بيتقتح و نحط عليه موس الفراوله.

4-    نسيبه في التلاجة من بالليل للصبح لحد ما يجمد.

5-    نحط النص التاني من الكيكه.

6-    نفتح القالب و أنا حبيت أخلي لون الكريمة اللي بره وردي فحطيت شويه من بودره جيلي الفراوله و سيبتها فتره عشان الحبيبات تدوب و زوقت بيها.

7-    مكنشي عندي كريمة تاني عملت كيس أيس كريم باودر شيكولاته ( اتصرفت يعني ) و زوقت بيه .

8-    لعمل الصوص بقه حطيت الزبده و السكر و الكاكاو علي النار لحد ما ساحت الزبده و بقت أحط لبن بشويش لحد ما وصلت للتقل المطلوب و لما برد صبيته علي التورته زي ما انتوا شايفين و بس.

يا رب تعجبكم